મોટરસાયકલના વ્હીલમાં દુપટ્ટો ફસાઈ જતાં પછડાયેલી યુવતીનું સારવારમાં મૃત્યુ

Author: નોબત સમાચાર

મોટરસાયકલના વ્હીલમાં દુપટ્ટો ફસાઈ જતાં પછડાયેલી યુવતીનું સારવારમાં મૃત્યુ

બાઈકની હડફેટે ચઢી જતાં સાયકલસવાર પ્રૌઢનું મૃત્યુઃ

જામનગર તા.૧૯ ઃ જસાપર ગામ પાસે મોટરસાયકલ પરથી પછડાયેલા ધુડસિયા ગામના યુવતીનું મૃત્યુ નિપજ્યું છે. પોતાના મિત્ર સાથે ફરવા નીકળેલી આ યુવતીનો દુપટ્ટો વ્હીલમાં ફસાયા પછી આ દુર્ઘટના સર્જાઈ હતી. ઉપરાંત સપ્તાહ પૂર્વે ખીમલીયા પાટિયા પાસે બાઈકની હડફેટે ચડેલા સાયકલસવાર પ્રૌઢનું મૃત્યુ થયું છે.

જામનગર તાલુકાના ધુડસિયા ગામમાં રહેતા હેતલબેન રાજેશભાઈ વડેચા નામના ૨૩ વર્ષના કોળી યુવતી મંગળવારે સાંજે પોતાના મિત્ર ખેંગારભાઈ મુંધવા સાથે મોટરસાયકલ પર ફરવા માટે નીકળ્યા હતા. આ બંને વ્યક્તિ જ્યારે કાલાવડના જસાપર ગામથી આગળ પહોંચ્યા ત્યારે હેતલબેને પહેરેલા ડ્રેસનો દુપટ્ટો મોટરસાયકલના પાછળના વ્હીલમાં આવી જતા આ યુવતી જોશભેર રોડ પર પછડાયા હતા. માથા સહિતના શરીરના અન્ય ભાગોમાં ગંભીર ઈજા પામેલા આ યુવતીને સારવાર માટે ખસેડવામાં આવ્યા હતા. જ્યાં તેઓનું સારવાર દરમિયાન મૃત્યુ નિપજ્યું છે. મૃતકના માતા રેખાબેન રાજેશભાઈ વડેચાએ પોલીસને જાણ કરી છે.

જામનગર તાલુકાના મોરકંડા ગામના પાટિયા પાસે વસવાટ કરતા રસીકભાઈ દામજીભાઈ ચૌહાણ નામના પ્રૌઢ ગઈ તા.૧૦ની સાંજે ખીમલીયા ગામમાં આવેલા મંદિરે દર્શનાર્થે આવ્યા પછી સાયકલ પર પરત ફરતા હતા ત્યારે ખીમલીયા ગામના પાટિયા પાસે સાંજના સાતેક વાગ્યે તેઓને જીજે-૧૦-ડીજી ૩૫૨૦ નંબરના મોટર સાયકલના ચાલકે હડફેટે લીધા હતા. આ અકસ્માતમાં ગંભીર રીતે ઘવાયેલા રસીકભાઈને સારવારમાં ખસેડવામાં આવ્યા પછી તેઓનું મૃત્યુ થયાનું જાહેર થયું છે. મૃતકના પુત્ર ભાવિનભાઈ ચૌહાણે મોટર સાયકલના ચાલક સામે પોલીસમાં ફરિયાદ નોંધાવી છે.

જો આપને આ પોસ્ટ ગમી હોય તો શેર કરો...