Author: નોબત સમાચાર
હાપા માર્કેટીંગ યાર્ડની ચૂંટણીમાં ૧૪ બેઠક માટે ૪ર ફોર્મ ભરાયા
૨૯ જાન્યુઆરીના ચિત્ર સ્પષ્ટ થશેઃ પાંચ ફેબ્રુ.ના મતદાનઃ
જામનગર તા. ર૪ઃ ખેતીવાડી ઉત્પન્ન બજાર સમિતિ (હાપા માર્કેટ યાર્ડ) ના ડાયરેક્ટરો માટેની ચૂંટણી આગામી માસે યોજાનાર છે. ગઈકાલે અંતિમ દિવસે કુલ ૧૪ બેઠક માટે ૪ર ઉમેદવારી પત્રો ભરાયા હતાં.
હાપા માર્કેટ યાર્ડની ખેડૂત અને વેપારી વિભાગના ડાયરેક્ટર માટેનો ચૂંટણી કાર્યક્રમ જાહેર થયો છે. ગઈકાલે ફોર્મ ભરવાના અંતિમ દિવસે ખેડૂત વિભાગની ૧૦ બેઠક માટે ર૮ ફોર્મ અને વેપારી વિભાગની ચાર બેઠક માટે ૧૪ ફોર્મ ભરાયા હતાં.
હવે, આજે ઉમેદવારી પત્રોની ચકાસણી કરવામાં આવી રહી છે. તા. ર૯ ના ઉમેદવારી પત્રો પાછા ખેંચી શકાશે. આ પછી ઉમેદવારોનું ચિત્ર સ્પષ્ટ થશે.
જ્યારે તા. પ-ર-ર૦ર૪ મતદાન અને તા. ૬ ના મતગણતરી હાથ ધરવામાં આવશે. હાલ યાર્ડ ઉપર ભાજપનું શાસન છે, જ્યારે આગામી સમયમાં યાર્ડમાં સત્તાનું સૂકાન કોણ સંભાળે છે એ તો આવનાર સમય જ કહેશે.
હાપા માર્કેટીંગ યાર્ડની ચૂંટણીમાં સખળ-ડખળ
જામનગર જિલ્લામાં સહકારી ક્ષેત્ર ખૂબ જ મહત્ત્વપૂર્ણ ગણાય તેવી હાપા માર્કેટીંગ યાર્ડની ચૂંટણીમાં ભાજપ પ્રેરિત પેનલના ઉમેદવારોની જાહેરાતમાં ગત્ ટર્મના એક જ ડાયરેક્ટરને રીપીટ કરાયા હોવાનું તથા ત્રણ-ચાર મોટી ભલામણવાળા દાવેદારોના પત્તા કપાયા હોવાનું જાણવા મળે છે.
યાર્ડની ૧૪ બેઠકોની ચૂંટણી માટે પ્રદેશ ભાજપમાંથી નામોની યાદી સાથેના મેન્ડેટ આવ્યા છે, પણ તેમાં ભાજપના તાલુકા પ્રમુખ અને કેબિનેટ મંત્રીના નજીકના ગણાતા મુકુન્દભાઈ સભાયાનું નામ નથી! આ ઉપરાંત રાજકારણના મહારથી ગણાતા પ્રવિણસિંહ ઝાલા તથા તેમના પુત્રના નામ પણ મેન્ડેટની યાદીમાં નહીં હોવાનું જાણવા મળે છે, જો કે પ્રદેશ ભાજપે મોકલેલા મેન્ડેટ પત્રને હજુ સુધી ગુપ્ત જ રાખવામાં આવ્યો હોવાનું જણાવાય છે, પણ ત્રણ-ચાર મોટી ભલામણવાળા દાવેદારોના નામ કપાયા હોવાની ચર્ચા શરૃ થતાં ભારે સખળ-ડખળ થયું છે.
આધારભૂત વર્તુળોમાંથી જાણવા મળતી વિગતો પ્રમાણે ભાજપ પ્રેરિત પેનલમાં ખેડૂત વિભાગમાં ઉમેદસિંહ જાડેજા, અશ્વિનભાઈ છૈયા, પ્રદ્યુમનસિંહ જાડેજા, જીતેનભાઈ પરમાર, જગદીશસિંહ જાડેજા, વિપુલ ચંદ્રેશભાઈ પટેલ, જમનભાઈ ભંડેરી, દયાળજીભાઈ ભીમાણી, ચંદ્રેશભાઈ સોજીત્રા તથા પ્રભાતભાઈ મકવાણાના નામો આવ્યા છે.
જો કે જેમના નામ મેન્ડેટમાં નથી તેમણે પણ ગઈકાલે ઉમેદવારી તો નોંધાવી જ દીધી છે અને ગાંધીનગર સુધી નામ મેન્ડેટમાં આવે તે માટે દોડધામ શરૃ થઈ ગઈ છે. આમ યાર્ડની ચૂંટણી મતદાન પાંચમી ફેબ્રુઆરીએ છે ત્યાં સુધીમાં કોઈ નવાજુની થવાની શક્યતા વર્તાઈ રહી છે.
જો આપને આ પોસ્ટ ગમી હોય તો શેર કરો...
Follow us: આ જ પ્રકારની બીજી પોસ્ટ માટે અમારી એપ ડાઉનલોડ કરો.
Android: https://rb.gy/surhtv
Apple ios: https://rb.gy/cee4r9
Social Media
ફોટો સ્ટોરી માટે અમારા ઇન્સ્ટાગ્રામ પેઈજને ફોલ્લો કરો
https://www.instagram.com/nobatdaily?r=nametag
વિડિયો માટે અમારી યુ-ટ્યૂબ ચેનલને સબસ્ક્રાઈબ કરો
https://youtube.com/@Nobatofficial
અન્ય સમાચારો
