ગેરકાયદેસર ખનીજ વહન કરતા છ વાહનો ઝડપાયા, રૂ।.૨.૧૦ કરોડનો મુદ્દામાલ જપ્ત

Author: નોબત સમાચાર

ગેરકાયદેસર ખનીજ વહન કરતા છ વાહનો ઝડપાયા, રૂ।.૨.૧૦ કરોડનો મુદ્દામાલ જપ્ત

જામનગર-ધ્રોલ રોડ પર ભૂસ્તર વિભાગની કાર્યવાહીઃ

જામનગર તા. ૧૩: જામનગરની ભૂસ્તર વિજ્ઞાનની કચેરીના સ્ટાફ દ્વારા ગઈકાલે જામનગર-ધ્રોલ રોડ પર આકસ્મિક તપાસ હાથ ધરવામાં આવી હતી. તપાસ દરમિયાન વિવિધ પ્રકારના ખનીજના ગેરકાયદેસર વહન તેમજ રોયલ્ટી પાસ કરતાં વધુ પ્રમાણમાં ખનીજના પરિવહન બદલ કુલ છ વાહનોને ઝડપી લેવામાં આવ્યા હતા. જેના પગલે ખનીજચોરોમાં ફફડાટ વ્યાપ્યો હતો.

આ ટીમની તપાસ દરમિયાન જીજે-૧૦-ટીવાય-૫૨૨૨ નંબરનું વાહન બ્લેકટ્રેપ ખનીજનું રોયલ્ટી પાસ કરતાં વધુ પ્રમાણમાં વહન કરતું હોવાનું સામે આવ્યું હતું. આ વાહનના માલિક તરીકે સાગરભાઈ અરવિંદભાઈ ચંદ્રપાલનું નામ સામે આવ્યું હતું.

તે ઉપરાંત જીજે-૧૦-ટીવાય-૯૪૬૩ નંબરના વાહનમાંથી સાદી રેતીનું ગેરકાયદેસર વહન થતું હોવાનું જાણવા મળ્યું હતું. આ વાહનના માલિક જયદીપભાઈ દિલીપભાઈ ચાંદ્રા હોવાનું સામે આવ્યું હતું. જ્યારે જીજે-૧૦-ટીવાય-૯૨૭૦ નંબરના વાહનમાંથી પણ સાદી રેતીનું ગેરકાયદેસર વહન ઝડપાયું હતું, જેના માલિક રમેશભાઈ વજેસંગભાઈ ઝાલા હોવાનું જાણવા મળ્યું હતું.

આ ઉપરાંત એમએચ-૪૮-ડીસી-૨૬૨૯ નંબરના વાહનમાંથી પણ સાદી રેતીનું ગેરકાયદેસર પરિવહન થતું હોવાનું સામે આવ્યું હતું. આ વાહનના માલિક વિશાલભાઈ હસમુખભાઈ વાસાણી હોવાનું જાણવા મળ્યું હતું. તેમજ જીજે-૧૦-ટીવાય-૫૩૧૦ નંબરનું વાહન, જેના માલિક જીતેન્દ્રભાઈ માલદેભાઈ ભૂતિયા છે, તેમજ જીજે-૧૦-ટીવાય-૭૪૬૮ નંબરનું વાહન, જે ઇન્ડિયન કન્સ્ટ્રક્શન, વાલકેશ્વરી, જામનગરના માલિકી હક હેઠળ હોવાનું જાણવા મળ્યું હતું, તેમાંથી પણ સાદી રેતીનું ગેરકાયદેસર વહન ઝડપાયું હતું.

ઉપરોક્ત તમામ વાહનોને નિયમો અનુસાર જપ્ત કરી પંચકોશી 'બી' પોલીસ સ્ટેશનમાં સોંપવામાં આવ્યા છે. જપ્ત કરાયેલા મુદામાલની કુલ અંદાજિત કિંમત આશરે રૂ।.૨.૧૦ કરોડ આકારવામાં આવી છે. આ કાર્યવાહીમાં ટીમના નૈતિક કણજારિયાએ મહત્વપૂર્ણ કામગીરી સંભાળી હતી.

જો આપને આ પોસ્ટ ગમી હોય તો શેર કરો...