ગોરધનપર પાસે અજાણ્યા વાહનની ઠોકરે ચઢી ગયેલા પ્રૌઢનું મૃત્યુઃ પોલીસ દ્વારા તપાસ

Author: નોબત સમાચાર

ગોરધનપર પાસે અજાણ્યા વાહનની ઠોકરે ચઢી ગયેલા પ્રૌઢનું મૃત્યુઃ પોલીસ દ્વારા તપાસ

શરીર પર ઈજાના ચીન્હ જોવા મળ્યાઃ

જામનગર તા. ૨૦: જામનગર-ખંભાળિયા ધોરીમાર્ગ પર ગોરધનપર નજીકથી ગઈકાલે સવારે એક અજાણ્યા પ્રૌઢનો મૃતદેહ મળી આવ્યો છે. આ પ્રૌઢને કોઈ વાહને હડફેટે લીધાની આશંકા સેવાઈ રહી છે. પોલીસે મૃતકની ઓળખ આપવા અનુરોધ કર્યાે છે.

જામનગર-ખંભાળિયા ધોરીમાર્ગ પર આવેલા ગોરધનપર ગામ નજીક ફૂડ રિસોર્ટ સામે ગઈકાલે સવારે એક અજાણ્યા પ્રૌઢ ઈજા પામેલી હાલતમાં જોવા મળતા કોઈએ પોલીસને જાણ કરી હતી. દોડી આવેલી સિક્કા પોલીસે તેઓને તપાસતા આ પ્રૌઢ મૃત્યુ પામેલા જણાઈ આવ્યા હતા.

આ પ્રૌઢના શરીર પર માથા તેમજ ડાબા પગમાં સાથળ પાસે ઈજાનું નિશાન જોવા મળ્યું છે અને પાછળ કમરના ભાગે છોલછાલ જણાઈ આવી છે. તેથી આ પ્રૌઢને અજાણ્યું વાહન હડફેટે લઈ નાસી ગયા પછી ઈજા પામેલા પ્રૌઢનું મૃત્યુ થયાનું તારણ કાઢવામાં આવ્યું છે.

સિક્કા પોલીસે મૃતદેહને પી.એમ. માટે ખસેડ્યા પછી જામનગરના સમાજ સેવક હિતેશગીરી ગોસાઈનું નિવેદન નોંધ્યું છે અને આ પ્રૌઢની ઓળખ આપવા જાહેર જનતાને અનુરોધ કર્યાે છે. મૃતકના શરીર પર લાલ રંગનું બ્લુ લીટીવાળુ અડધી બાયનું ટી-શર્ટ અને આછા પીળા રંગનું જીન્સ પેન્ટ ધારણ કરેલુ જોવા મળ્યું છે. મૃતક અંગે કોઈને જાણકારી હોય તો તેઓએ સિક્કા પોલીસ સ્ટેશન-૬૩૫૯૬ ૨૭૮૪૪ અથવા જમાદાર બી.જી ઝાલાનો સંપર્ક કરવો.

જો આપને આ પોસ્ટ ગમી હોય તો શેર કરો...