યુનિક મર્કન્ટાઈલ ઈન્ડિયા સામે કરાયેલી ફરિયાદો મંજૂરઃ વ્યાજ સાથે ચૂકવાશે રકમ

Author: નોબત સમાચાર

યુનિક મર્કન્ટાઈલ ઈન્ડિયા સામે કરાયેલી ફરિયાદો મંજૂરઃ વ્યાજ સાથે ચૂકવાશે રકમ

નગરના દંપતીએ ફોરમમાં નાખી હતી ધાઃ

જામનગર તા. ૨૦: જામનગરના એક દંપતીએ યુનિક મર્કન્ટાઈલ ઈન્ડિયા લિમિટેડ સામે ગ્રાહક ફોરમમાં કરેલી ફરિયાદમાં ફોરમે બંને વ્યક્તિને તેઓની ફીક્સ ડિપોઝિટ અન્વયે ચૂકવવાની થતી રકમ વ્યાજ સાથે ચૂકવી આપવા આદેશ કર્યાે છે.

જામનગરમાં વસવાટ કરતા ચંદ્રકાંત નરસિંહદાસ માંડલીયા તેમજ ચંદ્રિકાબેન ચંદ્રકાંત માંડલીયાએ યુનિક મર્કન્ટાઈલ ઈન્ડિયા લિમિટેડ પાસેથી રૂ.૧-૧ લાખ એમ બે ફીક્સ ડિપોઝિટ વાર્ષિક ૧૦ ટકાના વ્યાજદરે કરાવી હતી.

તેની પાકતી મુદ્દતે રૂ.૧,૮૦,૮૭૩ના બે ચેક મળી કુલ રૂ.૩,૬૧,૭૪૬ની રકમ ચૂકવવાની થતી હતી. તે રકમ પાકતી મુદ્દે ડિપોઝિટ રીસીપ્ટ જમા કરાવી હતી અને જણાવ્યું હતું કે, પૂરેપૂરી રકમ વ્યાજ સહિત મળી જશે તેમ છતાં રકમ ન ચૂકવાતા જામનગરની કન્ઝયુમર કોર્ટમાં સેવાકીય ખામી અંગે કેસ કરાયો હતો.

ઉપરોક્ત કેસ ચાલવા પર આવ્યો ત્યારે કંપનીના પ્રતિનિધિ ગ્રાહક ફોરમમાં હાજર રહ્યા ન હતા. ફોરમે ઉપરોક્ત ફરિયાદ મંજૂર કરતો આદેશ કર્યાે છે અને રૂ.૩,૬૧,૭૪૬ છ ટકાના વ્યાજ સાથે ચૂકવવા અને બંને કેસમાં રૂ.પ-પ હજાર ફરિયાદ ખર્ચ તથા ત્રાસ બદલ અલગથી આપવા આદેશ કરાયો છે. ફરિયાદીઓ તરફથી વકીલ ભાર્ગવ મહેતા, રામદે ગઢવી રોકાયા હતા.

જો આપને આ પોસ્ટ ગમી હોય તો શેર કરો...