જમ્મુ-કાશ્મીરમાં આતંકવાદીઓના ત્રીજા હુમલામાં પાંચ જવાનો ઘાયલઃ એક આતંકી ઠારઃ ડોડામાં એન્કાઉન્ટર

Author: નોબત સમાચાર

જમ્મુ-કાશ્મીરમાં આતંકવાદીઓના ત્રીજા હુમલામાં પાંચ જવાનો ઘાયલઃ એક આતંકી ઠારઃ ડોડામાં એન્કાઉન્ટર

કાશ્મીર ટાયગર નામના આતંકવાદી સંગઠને લીધી હુમલાની જવાબદારીઃ જંગલમાં ચાલી રહી છે અથડામણ

શ્રીનગર તા. ૧રઃ જમ્મુ-કાશ્મીરમાં રિયાસી તથા કઠુઆ પછી હવે ડોડામાં સેનાના ટેમ્પરણી ઓપરેશન બેઈઝ પર આતંકી હુમલો થતા પાંચ જવાનો ઘાયલ થયા છે, જ્યારે એક આતંકવાદી ઠાર કરાયો છે. કાશ્મીર ટાઈગર નામના આતંકી સંગઠને હુમલાની જવાબદારી લીધી છે.

જમ્મુ-કાશ્મીરના રિયાસી અને કઠુઆ પછી હવે આતંકવાદીઓએ ત્રીજો હુમલો કર્યો છે. આ વખતે આતંકવાદીઓએ ડોડા જિલ્લામાં સેનાના કામચલાઉ ઓપરેટીંગ બેઝ પર હુમલો કર્યો છે. આ હુમલામાં એક આતંકવાદી ઠાર કરવામાં આવ્યો છે, જ્યારે પાંચ જવાન ઈજાગ્રસ્ત થયાના અહેવાલ મળી રહ્યા છે.

હાલ રિયાસીના જંગલમાં અને ડોડામાં એન્કાઉન્ટર ચાલુ છે. ડોડા જિલ્લાના છત્રકલામાં આતંકવાદીઓ અને સુરક્ષા દળોના જવાનો વચ્ચે થયેલા ગોળીબારમાં સેનાના જે પાંચ જવાન ઈજાગ્રસ્ત થયાના અહેવાલ છે તેમાં એક સ્પેશિયલ પોલીસ ઓફિસર (એસપીઓ) પણ સામેલ છે. ઈજાગ્રસ્ત જવાનોને સારવાર અર્થે હોસ્પિટલમાં ખસેડવામાં આવ્યા છે. કાશ્મીર ટાઈગર નામના આતંકી સંગઠને આ હુમલાની જવાબદારી લીધી છે. અધિકારીઓના જણાવ્યાનુસાર બુધવારે સવારે લગભગ ૧-૪પ વાગ્યે છત્રકલામાં સેનાના જવાનો અને પોલીસની ટીમ દ્વારા સંયુક્ત ઓપરેશન હેઠળ આતંકવાદીઓને જડબાતોડ જવાબ આપવામાં આવી રહ્યો હતો.

આ પહેલા જમ્મુના એડીજીપી આનંદ જૈને કહ્યું હતું કે, એન્કાઉન્ટરમાં એક આતંકવાદી ઠાર કર્યો છે જ્યારે હુમલામાં એક નાગરિક ઈજાગ્રસ્ત થયો હતો, જો કે હવે આ વિસ્તાર ખતરાની બહાર છે. ઓપરેશન હજુ ચાલુ છે અને વરિષ્ઠ અધિકારીઓ સ્થળ પર હાજર છે.

હજુ પણ ઓછામાં ઓછો એક વધુ આતંકવદી આ વિસ્તારમાં છૂપાયલો છે, જેની શોધ ચાલુ છે. એક નાગરિક ઘાયલ થયો છે, જેને બહાર કાઢવામાં આવ્યો છે અને તે ખતરાની બહાર છે. કેટલાક સોશિયલ મીડિયા પ્લેટફોર્મ્સ પર શેર કરેલી બંધક જેવી પરિસ્થિતિના કોઈ અહેવાલ નથી.

જો આપને આ પોસ્ટ ગમી હોય તો શેર કરો...