મહિલા સાથે ફોન પર વાત કરતો હોવાની શંકા કરી એક શખ્સને ત્રણ શખ્સે લમધાર્યા

Author: નોબત સમાચાર

મહિલા સાથે ફોન પર વાત કરતો હોવાની શંકા કરી એક શખ્સને ત્રણ શખ્સે લમધાર્યા

પોલટ્રી ફાર્મના ધંધાખારના કારણે યુવકને માર પડ્યોઃ

જામનગર તા.૮ : જામનગરના શંકરટેકરીમાં રહેતા અને કેટરીંગનું કામ કરતા યુવાનને કામ આપવાની વાત કરી એક શખ્સ પોતાની સાથે વિજયનગરમાં લઈ ગયા પછી એક મહિલા સાથે ફોન પર વાત કરતો હોવાની શંકા કરી ત્રણ શખ્સે પાઈપથી ફટકારી હાથ ભાંગી નાખ્યો હતો. જ્યારે પોલટ્રી ફાર્મના ધંધાના ખારના કારણે એક યુવાનને બે શખ્સે માર મારી ધમકી આપી હતી.

જામનગરના શંકરટેકરી વિસ્તારમાં આવેલા સુભાષપરા માં રહેતા અને કેટરીંગનું કામ કરતા ખોડુભા રતનસંગ સોઢા રવિવારે રાત્રે પોતાના ઘરે હતા ત્યારે એક અજાણ્યો વ્યક્તિ આવ્યો હતો. તેઓએ કેટરીંગનું કામ છે તેમ કહી ખોડુભાને પોતાની સાથે આવવા કહ્યું હતું તેની સાથે ખોડિયારકોલોનીથી આગળ વિજયનગરમાં ખોડુભા પહોંચ્યા હતા.

આ વેળાએ ત્યાં હાજર શંકરટેકરીવાળા પિન્ટુ નંદાએ તંુ મારી ભાભી સાથે ફોનમાં વાત કરશ તેવી શંકા વ્યક્ત કરી ગાળો ભાંડ્યા પછી પિન્ટુ તથા તેની સાથે રહેલા બે અજાણ્યા શખ્સે પાઈપથી હુમલો કરી ખોડુભાને માર માર્યાે હતો અને તેઓનો હાથ ભાંગી નાખ્યો હતો. સિટી સી ડિવિઝન પોલીસ સ્ટેશનમાં ખોડુભાએ ફરિયાદ નોંધાવી છે.

જામનગરના ઘાંચીવાડમાં મોટી મસ્જિદ પાસે વસવાટ કરતા ફૈઝાન ફારૂકભાઈ પરમાર ગઈકાલે બપોરે ઘાંચીવાડ પાસે પોતાના પોલટ્રી ફાર્મમાંથી નીકળતા હતા ત્યારે ટીટોડી વાડી પાસે બંગલા વાડીમાં રહેતો તબરેઝ ખફી નામનો શખ્સ આવ્યો હતો.

આ શખ્સે ધંધાખારના કારણે ગાળો ભાંડી હતી અને ફોન કરીને અજાણ્યા શખ્સને બોલાવ્યો હતો. તે પછી બંનેએ એકત્ર થઈ ફૈઝાનને ઢીકાપાટુ વડે માર મારી જાનથી મારી નાખવાની ધમકી આપી હતી.

જો આપને આ પોસ્ટ ગમી હોય તો શેર કરો...