ટેકાના ભાવે ખરીદીની મુદ્દત લંબાવાઈ

Author: નોબત સમાચાર

ટેકાના ભાવે ખરીદીની મુદ્દત લંબાવાઈ

દ્વારકા જિલ્લાના ખેડૂતો ૩૧ મે સુધી કરી શકશે અરજી

ખંભાળિયા તા.૮: રવિ માર્કેટીંગ સીઝન ૨૦૨૫-૨૬ અંતર્ગત લઘુતમ ટેકાના ભાવે ઘઉંની સીધી ખરીદી માટેની મુદત લંબાવાઈ છે. તેથી દેવભૂમિ દ્વારકા જિલ્લાના ખેડૂતો તા. ૩૧ મે સુધી અરજી કરી શકશે.

ખેડૂતોને તેઓના ઉત્પાદનના પોષણક્ષમ ભાવ મળી રહે તે માટે રવિ માર્કેટીંગ સિઝન ૨૦૨૫-૨૬ માં રાજ્ય સરકાર દ્વારા લઘુતમ ટેકાના ભાવે રૂ. ૨,૪૨૫/- પ્રતિ કવી. ઘઉંની ખરીદી પ્રક્રિયા ગુજરાત રાજ્ય નાગરીક પુરવઠા નિગમ લી. મારફતે કરાઈ રહી છે. લઘુતમ ટેકાના ભાવે ઘઉંના વેચાણ કરવા ઇચ્છા ધરાવતા ખેડૂતોની ઓનલાઇન નોંધણી સ્થાનિક ગ્રામ્ય કક્ષાએ વી.સી.ઈ. મારફતે કરી શકાશે. ઘઉંની ખરીદીના રજિસ્ટ્રેશન માટે તા.૩૧/૦૫/૨૦૨૫ સુધી મુદતમાં વધારો કરવામાં આવ્યો છે.

નોંધણી માટે જરૂરી પુરાવા જેવા કે, આધાર કાર્ડની નકલ, અદ્યતન ગામ નમુનો ૭,૧૨/ ૮, પાક વાવણી અંગે એન્ટ્રી ના થઈ હોય તો પાકની વાવણી અંગેનો તલાટીના સહી સિક્કા સાથેનો દાખલો, ખેડૂતના નામના બેન્ક ખાતાની વિગત જેમ કે બેન્ક પાસબુકની નકલ અથવા કેન્સલ ચેકની નકલ સાથે લાવવાની રહેશે. રાજ્યના ખેડૂતો તેઓનો પાક લઘુતમ ટેકાના ભાવે વેચાણ કરવા ઇચ્છુક હોય તો તેઓની ઓનલાઇન નોંધણી ફરજીયાત હોઇ આ માટે સંબંધિત ગ્રામપંચાયતનો સંપર્ક કરી નોંધણી કરાવવા ખાસ અનુરોધ છે.

ટેકાના ભાવે ખરીદી માટે રજિસ્ટ્રેશન કરાવેલ ખેડૂતોને એસ.એમ.એસ. મારફતે ખરીદી અંગેની જાણ કરવામાં આવશે. ખરીદી સમયે ખેડૂતે પોતાનું આધારકાર્ડ /ઓળખપત્ર સાથે રાખવાનું રહેશે. ખેડુત ખાતેદારના બાયોમેટ્રિક ઓથેન્ટીકેશન દ્વારા જ જથ્થો ખરીદી કરવામાં આવશે. નોંધણી કરાવતી વખતે તમામ ડોક્યુમેન્ટસ વ્યવસ્થિત અપલોડ થાય તથા માગ્યા મુજબના જ અપલોડ થાય તેની સ્થળ /કાઉન્ટર છોડતા પહેલા ખાસ કાળજી રાખવી. દરમ્યાન જો ખોટા ડોક્યુમેન્ટ અપલોડ કરાયા હોવાનું ધ્યાને આવશે તો તેવા કિસ્સામાં આપનો ક્રમ રદ થશે અને ખરીદી માટે આપને જાણ નહી કરવામાં આવે તેની ખાસ નોંધ લેશો.

નોંધણી બાબતે કોઇ મુશ્કેલી જણાય તો હેલ્પલાઇન નંબર ૮૫૧૧૧૭૧૭૧૮ તથા ૮૫૧૧૧૭૧૭૧૯ ઉપર સંપર્ક કરવાનો રહેશે તેમ જિલ્લા પુરવઠા અધિકારીની યાદીમાં જણાવ્યું છે.

જો આપને આ પોસ્ટ ગમી હોય તો શેર કરો...