કચ્છમાં એલપીજી ગેસનું ટેન્કર અચાનક ધડાકાભેર ફાટતા ૬ થી ૭ વાહનો બળીને ખાખઃ ટ્રાફિક જામ

Author: નોબત સમાચાર

કચ્છમાં એલપીજી ગેસનું ટેન્કર અચાનક ધડાકાભેર ફાટતા ૬ થી ૭ વાહનો બળીને ખાખઃ ટ્રાફિક જામ

દુર્ઘટનામાં ટેન્કર ચાલક સહિત કેટલાકના મૃત્યુની આશંકાઃ રાહત-બચાવ શરૂ

ભૂજ તા. ૧: કચ્છમાં ભચાઉ નજીક એલપીજી ગેસ ટેન્કરમાં અચાનક પ્રચંડ બ્લાસ્ટ થતા ૬ થી ૭ વાહનો ભસ્મીભૂત થઈ ગયા છે. જાનહાનિની આશંકા સેવાઈ રહી છે.

કચ્છના ભચાઉ નજીક કટારિયા તીર્થ નજીક આજે સવારે એક ગંભીર દુર્ઘટના સર્જાઈ છે. જુના કટારિયા ઓવરબ્રિજથી માળિયા તરફ જતા નેશનલ હાઈવે પર એલપીજી ગેસ ભરેલું ટેન્કર ધડાકાભેર ફાટ્યું હતું, જેના કારણે આસપાસના અનેક વાહનો પણ આગની લપેટમાં આવી ગયા હતાં. બનાવ અંગે જાણ થતા જ તાત્કાલિક રાહત અને બચાવ કામગીરી શરૂ કરવામાં આવી હતી.

આ દુર્ઘટના નેશનલ હાઈવે પર ઘટી છે અને તેના કારણે ભયાવહ દૃશ્યો સર્જાયા હતાં. ગેસ ભરેલા ટેન્કરના ફૂરચા ધડાકા સાથે દૂર દૂર સુધી ઊડી ગયા હતાં. ફાટવાના કારણે લાગેલી ભીષણ આગમાં નજીકની હાઈવે હોટેલ પાસે ઊભેલા લથી સાત જેટલા ટ્રક અને ટ્રેલર પણ લપેટમાં આવીને બળીને ભસ્મીભૂત થઈ ગયા હતાં.

આ ભગનાક દુર્ઘટનામાં જાનહાનિની આશંકા સેવવામાં આવી રહી છે. દુર્ઘટનામાં ટેન્કરના ચાલક સહિત અન્ય લોકોના મોત થયા હોવાની આશંકા સેવાઈ રહી છે, જો કે સત્તાવાર પુષ્ટિની રાહ જોવાઈ રહી છે. દુર્ઘટનાના પગલે નેશનલ હાઈવે પર લાંબો ટ્રાફિક જામ સર્જાઈ ગયો છે.

બનાવ અંગે જાણ થતાં જ તાત્કાલિક રાહત અને બચાવ કામગીરી શરૂ કરવામાં આવી હતી. ભચાઉ ફાયરબ્રિગેડની ટીમે સ્થળ પર દોડી જઈને યુદ્ધના ધોરણે અગ્નિશમનની કામગીરી હાથ ધરી હતી. સામખિયાળી પોલીસની ટીમ પણ સ્થળ પર પહોંચી ગઈ છે અને પરિસ્થિતિને કાબૂમાં લેવા અને ટ્રાફિક વ્યવસ્થાપન માટેની કાર્યવાહી કરી રહી છે.

જો આપને આ પોસ્ટ ગમી હોય તો શેર કરો...