ફાયનાન્સ પેઢી પાસેથી લોન મેળવી ચેક આપનાર આસામીને છ મહિનાની કેદ

Author: નોબત સમાચાર

ફાયનાન્સ પેઢી પાસેથી લોન મેળવી ચેક આપનાર આસામીને છ મહિનાની કેદ

વ્યાજખોરીના કથનો બચાવમાં ટકવાને પાત્ર નથીઃ

જામનગર તા. ર૪ઃ જામનગરની એક ફાયનાન્સ પેઢી પાસેથી લોન મેળવી તેની પરત ચૂકવણી માટે ચેક આપનાર આસામી સામે કોર્ટમાં ચેક પરતની ફરિયાદ કરવામાં આવી હતી. આ કેસ ચાલી જતા અદાલતે આરોપીને છ મહિનાની કેદ અને ચેકની રકમ વળતર પેટે ફરિયાદીને ચૂકવી આપવાનો હુકમ કર્યો છે. હાલમાં વ્યાજખોરી અંગે કરાતી ફરિયાદો વચ્ચે આ કેસમાં આરોપીપક્ષે ઉંચુ વ્યાજ લેવાયું હોવાની દલીલ કરી હતી. અદાલતે વ્યાજખોરી અંગેના કથનો કરી લેવામાં આવેલો બચાવ ટકવાને પાત્ર નથી તેવી દલીલ ગ્રાહ્ય રાખી હતી.

જામનગરમાં વસવાટ કરતા નિવૃત્ત આર્મીમેન નેકુળભાઈ દેશળભાઈ લાંબા નાણા ધીરધાર કરવા માટેનો પરવાનો ધરાવે છે. તેઓની અભિષેક ફાયનાન્સ નામની પેઢી પાસેથી એમ.ઈએસમાં નોકરી કરતા રાજેશ લખમણભાઈ ખારેચાએ રૃા. ૭૦ હજારની લોન મેળવી હતી. તેનું વાર્ષિક ૧૮ ટકા વ્યાજ નિર્ધારિત કરાયું હતું.

લોનની ચૂકવણી માટે રાજેશ ખારેચાએ રૃા. ૮૦ હજારનો ચેક આપ્યો હતો. તે ચેક બેન્કમાંથી પરત ફરતા નેકુળભાઈએ નોટીસ પાઠવ્યા પછી અદાલતમાં ફરિયાદ નોંધાવી હતી. તે કેસ ચાલવા પર આવતા ગેરકાયદેસર રીતે ઉંચા વ્યાજે નાણા ધીરવામાં આવ્યા છે કે કેમ ? નાણા ચૂકવી આપ્યા હોવા છતાં ચેકનો મીસયુઝ કરી ખોટો કેસ કરાયો છે કે કેમ? તે બાબતે ઉલટતપાસ લેવાયા પછી ફરિયાદીપક્ષ દ્વારા બેન્કના સાક્ષી અને નાણા ધીરધારના નિયમ અનુસારના પુરાવા આપવામાં આવ્યા હતાં.

તે પુરાવા લેવાયા પછી આરોપીપક્ષે બાકી રકમ વ્યાજ સાથે ચૂકવી આપી છે. આરોપી પાસેથી ઉંચુ વ્યાજ લેવામાં આવ્યું છે તેવી દલીલ કરવામાં આવી હતી. તેની સામે ફરિયાદી તરફથી રોકાયેલા વકીલે કરેલી દલીલો ગ્રાહ્ય રાખી આરોપી રાજેશ લખમણભાઈ ખારેચાને ચેક પરતના કેસમાં તકસીરવાન ઠરાવી અદાલતે છ મહિનાની કેદ અને રૃા. ૮૦ હજાર ફરિયાદીને ચૂકવી આપવાનો હુકમ કર્યો છે તે રકમ ચૂકવવામાં ન આવે તો વધુ ૧ મહિનાની કેદની સજા ફરમાવવામાં આવી છે. ફરિયાદી અભિષેક ફાયનાન્સવાળા નેકુળભાઈ લાંબા તરફથી વકીલ રાજેશ ગોસાઈ, વિશાલ જાની, એમ.આર ગોહિલ, રજનીકાંત નાખવા, નિતેષ મુછડીયા રોકાયા હતાં.

જો આપને આ પોસ્ટ ગમી હોય તો શેર કરો...