ભાણવડના ધારાગઢ પાસે સ્વીફ્ટ સાથે બોલેરો ટકરાતા એક યુવાનનું થયું મૃત્યુ

Author: નોબત સમાચાર

ભાણવડના ધારાગઢ પાસે સ્વીફ્ટ સાથે બોલેરો ટકરાતા એક યુવાનનું થયું મૃત્યુ

સાથે રહેલા સગા ભાઈને થઈ ઈજાઃ

જામનગર તા. ૧૪: ભાણવડના ધારાગઢ ગામના પાટીયાથી વેરાડ ગામ વચ્ચે સોમવારે રાત્રે બારેક વાગ્યે સ્વીફટ મોટર સાથે બોલેરો પીકઅપ વાન ટકરાઈ પડતા પોરબંદરના કોટડા ગામના એક યુવાનનું ગંભીર ઈજા થવાથી મૃત્યુ નિપજ્યું છે અને તેમની સાથે રહેલા એક યુવાનને ઈજા થઈ છે. અકસ્માત સર્જી નાસી ગયેલા બોલેરોચાલક સામે પોલીસે ગુન્હો નોંધ્યો છે. પોરબંદર જિલ્લાના કુતિયાણા તાલુકાના કોટડા ગામના ભરતભાઈ અરજણભાઈ આગઠ તથા તેમના ભાઈ અજીતભાઈ જીજે-૧૦-એપી ૯૬૦૮ નંબરની મોટરમાં સોમવારે અમદાવાદ થી પોતાના ગામ જવા માટે નીકળ્યા હતા.

સોમવારે રાત્રે બારેક વાગ્યે તેમની મોટર જ્યારે ભાણવડ નજીકના ધારાગઢ પાટીયા પાસે પહોંચી ત્યારે જીજે-રપ-યુ ૮૭૯૦ નંબરની બોલેરો પીકઅપ વાન દોડી આવી હતી. તેના ચાલકની બેદરકારીના કારણે અકસ્માત સર્જાયો હતો. બંને વાહન ટકરાઈ પડતા ભરતભાઈ આગઠને છાતી, માથા, પેટમાં ઈજા થઈ હતી. તેઓનું મૃત્યુ નિપજ્યું છે. જ્યારે સાથે રહેલા રણજીતભાઈને ઈજા થઈ છે. અકસ્માત સર્જી બોલેરોચાલક નાસી ગયો છે. તેની સામે રમેશભાઈ આગઠે ભાણવડ પોલીસ સ્ટેશનમાં ફરિયાદ નોંધાવી છે.

જો આપને આ પોસ્ટ ગમી હોય તો શેર કરો...