Author: નોબત સમાચાર
સસોઈ ડેમ તરફ જવાના રસ્તા પર મીની ટ્રકમાંથી મળ્યો દારૂ-બીયરનો જંગી જથ્થો
ભુસા ભરેલા બાચકા હટાવતા જ મળી આવ્યા ૫૧ પેટી દારૂ અને બીયરના ૧૨૯૬ ટીનઃ
જામનગર તા. ૧૪: લાલપુર તાલુકામાં આવેલા સસોઈ ડેમ તરફ જવાના જૂના રસ્તા પર ગઈરાત્રે એક માલ વાહક વાહનમાં દારૂનું કટીંગ થઈ રહ્યું હોવાની બાતમી પરથી ધસી ગયેલી પોલીસે ત્યાંથી મળી આવેલા વાહનની તલાશી લીધી હતી. તેમાં આગળ ભુસાના બાચકા રાખેલા હતા તેને ઉંચકાવી પોલીસે ચેકીંગ કરતા ૫૧ પેટીમાં ભરેલો દારૂનો જથ્થો અને ૧૨૯૬ નંગ બીયરના ટીન મળી આવ્યા હતા. દારૂ-બીયર તથા વાહન કબજે કરી પોલીસે તેના ચાલક અને દારૂ મંગાવનાર શખ્સના સગડ દબાવ્યા છે. જ્યારે કાલાવડના બાંગાથી બેરાજા ગામ વચ્ચે મોટી ભલસાણ ગામનો એક શખ્સ દારૂના ૨૦ ચપલા સાથે ઝડપાઈ ગયો હતો. તેણે પોતાના સાગરિતનું નામ પોલીસને આપ્યું છે.
લાલપુરથી મેઘપર જવાના માર્ગ પર આવેલા સસોઈ ડેમ તરફના જૂના રસ્તા પર ગઈરાત્રે એક વાહનમાં અંગ્રેજી શરાબની હેરાફેરી થઈ રહી હોવાની બાતમી મળતા લાલપુર પોલીસ સ્ટેશનના સ્ટાફે પીએસઆઈ એસ.પી. ગોહિલના વડપણ હેઠળ વોચ ગોઠવી હતી.
તે દરમિયાન સસોઈના જૂના રસ્તા પર બાવળની ઝાળી નજીક જીજે-૨૪-એક્સ ૬૦૮૧ નંબરનંુ છોટા હાથી જેવું માલ વાહક વાહન જોવા મળ્યંુ હતું. તેની પોલીસે તલાશી લેતા આગળ ભુસા ભરેલા બાચકા જોવા મળ્યા હતા. તે બાચકા પોલીસે ઉંચકાવીને ચેક કરતા તે વાહનમાંથી ભારતીય બનાવટના અંગ્રેજી શરાબની જુદી જુદી બ્રાંડની બોટલો ભરેલા બોક્સ નીકળી પડ્યા હતા. કુલ ૫૧ બોક્સમાં દારૂની નાની મોટી બોટલો તથા બીયર ભરેલો હતો. પોલીસે ૫૧ બોક્સમાં રહેલો દારૂ અને બીયરના ૧૨૯૬ ટીન કબજે કર્યા છે. પોલીસે રૂ. ૨ લાખ ૭૭ હજાર ૨૦૦નો દારૂ તથા બીયરનો જથ્થો, રૂ. સાડા ત્રણ લાખનું વાહન તથા ભુસાના ૩૦ બાચકા મળી કુલ રૂ. ૬,૨૭,૨૦૦નો મુદ્દામાલ કબજે લીધો છે. આ વાહનના ચાલક, માલિક તેમજ દારૂનો જથ્થો મંગાવનાર શખ્સના લાલપુર પોલીસ સગડ દબાવી રહી છે.
કાલાવડ તાલુકાના બાંગા ગામથી બેરાજા ગામ તરફ જવાના રસ્તા પરથી ગઈકાલે પસાર થઈ રહેલા જામનગર તાલુકાના મોટી ભલસાણ ગામના નરેન્દ્ર ઉર્ફે નરેશ પાલાભાઈ પરમાર નામના શખ્સની પોલીસે રોકાવી તેની તલાશી લેતા તેના કબજામાંથી દારૂના ૨૦ ચપલા મળી આવ્યા હતા. આ શખ્સે તે ચપલા જામનગરના રણજીત સાગર રોડ પર હર્ષદ મીલની ચાલીમાં રહેતા પ્રકાશ કાનાભાઈ પરમારે આપ્યાની કબૂલાત કરી છે.
જો આપને આ પોસ્ટ ગમી હોય તો શેર કરો...
Follow us: આ જ પ્રકારની બીજી પોસ્ટ માટે અમારી એપ ડાઉનલોડ કરો.
Android: https://rb.gy/surhtv
Apple ios: https://rb.gy/cee4r9
Social Media
ફોટો સ્ટોરી માટે અમારા ઇન્સ્ટાગ્રામ પેઈજને ફોલ્લો કરો
https://www.instagram.com/nobatdaily?r=nametag
વિડિયો માટે અમારી યુ-ટ્યૂબ ચેનલને સબસ્ક્રાઈબ કરો
https://youtube.com/@Nobatofficial
અન્ય સમાચારો
