સગીરા પર દુષ્કર્મ ગુજારી ગર્ભવતી બનાવી દેનાર શખ્સને વીસ વર્ષની કેદ

Author: નોબત સમાચાર

સગીરા પર દુષ્કર્મ ગુજારી ગર્ભવતી બનાવી દેનાર શખ્સને વીસ વર્ષની કેદ

સગીરાને રૃા.૧૧ લાખનું ચૂકવાશે વળતરઃ

જામનગર તા.૫ ઃ કલ્યાણપુર તાલુકાના ગોકલપર ગામના એક શખ્સે તેર વર્ષની સગીરા પર અવારનવાર દુષ્કર્મ ગુજારી તેણીને ગર્ભવતી બનાવી દીધાની ફરિયાદ થયા પછી આ કેસમાં ખાસ પોક્સો અદાલતે આરોપીને વીસ વર્ષની સખત કેદની સજા ફટકારી છે. સગીરાને રૃા.૧૧ લાખનું વળતર ચૂકવવામાં આવશે.

દેવભૂમિ દ્વારકા જિલ્લાના કલ્યાણપુર તાલુકાના ગોકલપર ગામના રાજા લખમણભાઈ કણઝારીયા નામના શખ્સે થોડા મહિનાઓ પહેલા તેર વર્ષની એક સગીરાને પોતાની સાથે નજીકમાં આવેલા ખેતરની ઓરડીમાં લઈ જઈ તેણી પર દુષ્કર્મ ગુજાર્યું હતું.

ત્યારપછી આ શખ્સે દુષ્કર્મનો સિલસિલો શરૃ કરતા તે બાળા ગર્ભવતી બની ગઈ હતી. તેણીના પેટમાં બે મહિનાનો ગર્ભ રહી ગયો હતો. તેની તરૃણીના પરિવારને જાણ થયા પછી પોલીસમાં ફરિયાદ કરવામાં આવી હતી. પોલીસે આઈપીસી અને પોક્સો એક્ટ હેઠળ ગુન્હો નોંધી આરોપીની ધરપકડ કરી હતી. આરોપી તથા તે તરૃણીની તબીબી ચકાસણી કરાવાઈ હતી.

ઉપરોક્ત કેસ દેવભૂમિ દ્વારકા જિલ્લાની ખાસ પોક્સો અદાલતમાં ચાલવા પર આવતા ફરિયાદ પક્ષે પંદર સાહેદોની જુબાની રજૂ કરી હતી. અદાલતે ફરિયાદી, ભોગ બનનાર તબીબની જુબાની અને અન્ય દલીલો ગ્રાહ્ય રાખી આરોપી રાજા લખમણભાઈ કણજારીયાને તક્સીરવાન ઠરાવ્યા પછી વીસ વર્ષની સખત કેદની સજા અને રૃા.૨૫ હજારનો દંડ ફટકાર્યાે છે. ભોગ બનનાર તરૃણીને કમ્પેન્સેશન સ્કીમમાંથી રૃા.૧૧ લાખનું વળતર ચૂકવવાનો અદાલતે આદેશ કર્યાે છે.

જો આપને આ પોસ્ટ ગમી હોય તો શેર કરો...