નંદનવનમાં મકાનમાંથી દારૂની છવ્વીસ બોટલ ઝડપાઈઃ આરોપીએ બેના નામ આપ્યા

Author: નોબત સમાચાર

નંદનવનમાં મકાનમાંથી દારૂની છવ્વીસ બોટલ ઝડપાઈઃ આરોપીએ બેના નામ આપ્યા

રણજીતસાગર રોડ તથા સણોસરી પાસેથી અઢાર બોટલ મળીઃ

જામનગર તા. ૫ઃ જામનગરની નંદનવન સોસાયટીમાં આવેલા એક મકાનમાંથી ગઈકાલે એલસીબીએ અંગ્રેજી શરાબની છવ્વીસ બોટલ કબજે કરી છે. ઝડપાયેલા આરોપીએ અન્ય બેના નામ આપ્યા છે. જ્યારે રણજીતસાગર રોડ પરથી એક શખ્સ નવ બોટલ સાથે અને લાલપુરના સણોસરી ગામ પાસેથી બે શખ્સ નવ ચપલા સાથે પકડાઈ ગયા છે. તેઓના મોબાઈલ, બાઈક પણ કબજે કરાયા છે.

જામનગરના રણજીત સાગર રોડ પર આવેલી નંદનવન સોસાયટીની શેરી નં.૩માં એક મકાનમાં અંગ્રેજી શરાબનો જથ્થો પડ્યો હોવાની બાતમી એલસીબીના હરદીપ બારડ, મયુરસિંહને મળતા પીઆઈ જે.વી. ચૌધરીને વાકેફ કરાયા પછી પીએસઆઈ આર.કે. કરમટા, પી.એન. મોરીના વડપણ હેઠળ સ્ટાફે ગઈકાલે સાંજે ત્યાં આવેલા જયેશ કિશોરભાઈ ચાંદ્રા ઉર્ફે જયુુ સિંધી નામના શખ્સના મકાનમાં દરોડો પાડ્યો હતો.

તે મકાનની તલાશી લેવાતા ત્યાંથી વ્હીસ્કીની બે બ્રાન્ડની કુલ ૨૬ બોટલ મળી આવી હતી. એલસીબીએ રૃા.૧૦,૪૦૦ની કિંમતનો શરાબનો જથ્થો કબજે કરી જયેશ ચાંદ્રાની પૂછપરછ કરતા આ શખ્સે તે જથ્થો જીતુ ઉર્ફે બાબલા ભાનુશાળી તથા ભાવેશ ભાનુશાળી ઉર્ફે ટાકીડાએ આપ્યો હોવાની કબૂલાત કરી છે.

જામનગર-સમાણા હાઈવે પર આવેલા વીડીબી પાર્ટી પ્લોટ પાસેથી ગઈરાત્રે પસાર થતાં જેજે કુબેરનગરવાળા હીરેન અનિલભાઈ ચોવટીયા ઉર્ફે હીરા પટેલ નામના શખ્સને પોલીસે શકના આધારે રોકાવી ચેક કરતા આ શખ્સના કબજામાંથી અંગ્રેજી શરાબની નવ બોટલ મળી આવી હતી. આ શખ્સે તે જથ્થો વિજય ભૂવા નામના પટેલ શખ્સે આપ્યો હોવાનું પોલીસને જણાવ્યું છે. પોલીસે બંને સામે ગુન્હો નોંધ્યો છે.

લાલપુર તાલુકાના સણોસરી ગામના પાટિયા પાસેથી ગઈકાલે સાંજે પસાર થતાં જીજે-૧૦-ડીએસ ૯૯૩૧ નંબરના બાઈકને પોલીસે રોકાવી ચેક કરતા તેના પર જઈ રહેલા જામજોધપુરના કરશનપર ગામના દીપક જેઠાભાઈ ધવલ તથા હરેશ દાનાભાઈ ધવલ નામના બે શખ્સના કબજામાંથી અંગ્રેજી શરાબના નવ ચપટા મળી આવ્યા હતા. પોલીસે ચપટા, બે મોબાઈલ, બાઈક મળી કુલ રૃા.૬૩,૮૦૦નો મુદ્દામાલ કબજે લીધો છે.

જો આપને આ પોસ્ટ ગમી હોય તો શેર કરો...