ગુજરાત સહિત દેશના અનેક રાજ્યોમાં ધોધમાર વરસાદઃ નદી-નાળા ભરપૂર

Author: નોબત સમાચાર

ગુજરાત સહિત દેશના અનેક રાજ્યોમાં ધોધમાર વરસાદઃ નદી-નાળા ભરપૂર

જનજીવન પ્રભાવિતઃ કેટલાક સ્થળે સ્થિતિ વણસીઃ પૂરમાં ફસાયા લોકોઃ વીજળી પડવાથી ૨૪ કલાકમાં ૧૦ના મોતઃ પરિવહન ઠપ્પ

અમદાવાદ/ નવી દિલ્હી તા. ૨૦ઃ ગુજરાત સહિત અનેક રાજ્યોમાં ભારે વરસાદ પછી પૂર અને જલભરાવના કારણે સ્થિતિ વણશી છે અને શાળા-કોલેજો બંધ રાખવા પડયા છે. આકાશી વિજળી પડવાથી ૨૪ કલાકમાં ૧૦ના મૃત્યુ થયા છે. સાર્વત્રિક જળબંબાકારના કારણે પરિવહન ખોરવાયું છે. અને જનજીવનને માઠી અસર પહોંચી છે.

છેલ્લા બે દિવસમાં રાજસ્થાન, મધ્યપ્રદેશ, ગુજરાત, ઝારખંડ, બિહાર અને ઉત્તર પ્રદેશમાં ચોમાસાએ એન્ટ્રી કરી છે. ભારે વરસાદને કારણે ગુજરાતના અમદાવાદ, વાપી અને રાજકોટમાં રસ્તાઓ, ઘરો અને દુકાનોમાં પાણી ભરાઈ ગયા હતા. સાવરકુંડલા અને રાજુલામાં નદીઓ છલકાઈ ગઈ છે.

ઉત્તર પ્રદેશના લખનઉ-સીતાપુરમાં આખી રાત વરસાદ પડ્યો. અમેઠીમાં એટલો વરસાદ પડ્યો કે એસપી ઓફિસ અને ગૌરીગંજ પોલીસ સ્ટેશનમાં પાણી ભરાઈ ગયા. ફાયર બ્રિગેડની ટીમે એસપી ઓફિસમાંથી પાણી કાઢ્યું. તેમજ, વીજળી પડવાથી ૨૪ કલાકમાં ૧૦ લોકોના મોત થયા છે.

ચોમાસાની એન્ટ્રી પછી પણ રાજસ્થાનના કેટલાક વિસ્તારોમાં ગરમી યથાવત છે. જેસલમેરમાં ૪૪.૬ ડિગ્રી તાપમાન નોંધાયું હતું. આ દરમિયાન, જમ્મુ અને કાશ્મીરના શ્રીનગર સહિત ખીણના ઘણા વિસ્તારોમાં ગુરુવાર સૌથી ગરમ દિવસ રહૃાો હતો. અહીં તાપમાન ૩૫.૨ ડિગ્રી હતું.

ગુરુવારે રાત્રે મહારાષ્ટ્રના અનેક જિલ્લાઓમાં ભારે વરસાદ પડતાં હવામાન વિભાગે ચેતવણી આપી હતી. આના કારણે ઘણી નદીઓ ભયજનક નિશાનથી ઉપર વહી રહી છે. રાયગઢમાં અંબા અને કુંડલિકા નદીઓ ભયજનક નિશાનને પાર થઈ ગઈ છે. તેમજ, પાતાળગંગા નદી માટે પણ ચેતવણી આપવામાં આવી છે.

રત્નાગિરીમાં જગબુડી નદી પણ ભયજનક નિશાનથી ઉપર વહી રહી છે. સાવચેતીના પગલા રૃપે, રાયગઢ જિલ્લાની તમામ સ્કૂલો અને કોલેજો આજે માટે બંધ રાખવામાં આવી છે.

પશ્ચિમ મહારાષ્ટ્રમાં, ઇન્દ્રાયણી અને કેટલીક અન્ય નદીઓમાં પૂર આવ્યું છે. નાસિકમાં, ભારે વરસાદને કારણે ગોદાવરી નદી બે કાંઠે વહી રહી છે. અહીંના ઘણા મંદિરો ગોદાવરીના પાણીમાં ડૂબી ગયા છે.

ભારે વરસાદ બાદ મહારાષ્ટ્રના ઘણા શહેરોમાં પરિસ્થિતિ વધુ વણસી છે, નાસિક-પુણેની હાલત ખરાબ છે, મુંબઈમાં પણ વરસાદ માટે ઓરેન્જ એલર્ટ છે, બીજી તરફ ગુજરાતના ઘણા શહેરો છલકાઈ ગયા છે, અમદાવાદ, ગાંધીનગર, નવસારી, અમરેલી અને ધાંગ પૂરની સ્થિતિનો સામનો કરી રહૃાા છે, લોકો નીચાણવાળા વિસ્તારોમાં ગામડાઓમાં ફસાયેલા છે.

આ ઉપરાંત, બિહાર અને પશ્ચિમ બંગાળમાં પણ પરિસ્થિતિ ખરાબ નથી, નદીઓ અને નાળાઓ પૂરમાં છે, બિહારના ઘણા શહેરોમાં નદીઓ પોતાના કાંઠા તોડીને શહેરોમાં પ્રવેશી છે, કયાંક કાર તરતી છે અને કયાંક લોકો ફસાયેલા છે, બંગાળમાં પણ આવી જ સ્થિતિ છે, ભારે વરસાદ બાદ ૫શ્ચિમ બંગાળના ઘણા શહેરોમાં પૂરની સ્થિતિ છે.

આ વિસ્તારોમાં થોડા દિવસો સુધી ભારે વરસાદની સ્થિતિ રહેશે. હવામાન વિભાગના જણાવ્યા અનુસાર, આજે મધ્ય મહારાષ્ટ્ર, છત્તીસગઢ, ઝારખંડ અને પૂર્વી ઉત્તર પ્રદેશમાં ભારેથી અતિ ભારે વરસાદની ચેતવણી આપવામાં આવી છે. દેશના મોટાભાગના ભાગોમાં ભારે વરસાદ સાથે વીજળી અને ધૂળના તોફાનની ચેતવણી આપવામાં આવી છે.

ઝારખંડના સ્ટીલ સિટીમાં વાહનો સંપૂર્ણપણે પાણીમાં ડૂબી ગયા છે. આ વિસ્તારના તમામ વાહનોની છત ઉપર પાણી વહી રહૃાું છે. જ્યાં વાહનો ચાલતા હતા, ત્યાં હોડીઓ ચલાવવાની જરૃર છે. જમશેદપુરના આદર્શ નગરમાં, ત્રણ દિવસ સુધી સતત વરસાદ પડ્યો અને કોલોનીમાં પહેલા માળ સુધી પાણી ફરી વળ્યું છે. અહીં હજુ પણ ભારે વરસાદની આગાહી છે, જેના કારણે રાંચી સહિત ઝારખંડના પાંચ જિલ્લાઓમાં શુક્રવારે શાળાઓ બંધ રહેશે. રાંચી, ખૂંટી અને પશ્ચિમ સિંહભૂમ જિલ્લામાં આજે બધી શાળાઓ બંધ રહેશે, જ્યારે પૂર્વ સિંહભૂમ અને સરાયકેલા-ખરસાવન જિલ્લામાં ધોરણ ૮ સુધી રજા રહેશે.

ગુજરાતમાં જળબંબાકાર

ગુજરાતમાં નૈઋત્યના ચોમાસાના આગમન સાથે જ મેઘરાજા મન મૂકીને વરસી રહૃાા છે. રાજ્યમાં છેલ્લા ૨૪ કલાકમાં ૧૦૧ તાલુકામાં વરસાદ વરસ્યો હતો. જેમાં ૩૦ તાલુકામાં ૧થી ૭ ઈંચ સુધીનો વરસાદ ખાબક્યો હતો. વલસાડના વાપીમાં સૌથી વધુ સાત ઈંચ વરસાદ નોંધાયો હતો. વલસાડના પારડીમાં સવા પાંચ, તો કપરાડામાં પાંચ ઈંચ વરસાદ વરસ્યો હતો. ભારે વરસાદને પગલે અત્યારસુધી કુલ ચાર જિલ્લામાં ૧૦૬૦ લોકોનું સ્થળાંતર કરાયું છે જ્યારે ૧૮૯ લોકોનું રેસ્ક્યુ કરાયુ છે. હવામાન વિભાગ દ્વારા શુક્રવારે (૨૦મી જૂન) ડાંગ-નવસારી-વલસાડમાં રેડ જ્યારે દાહોદ-મહીસાગર-ભરૃચ-સુરત-તાપીમાં ઓરેન્જ એલર્ટ જાહેર કરાયું છે.

છેલ્લા ૨૪ કલાક દરમિયાન વલસાડના ઉમરગામ અને નવસારીના ખેરગામમાં ૪ ઈંચ જેટલો તેમજ ભરૃચના હાંસોટ અને વાલિયા, સુરતના ઓલપાડ તથા ડાંગના વઘાઈ તાલુકામાં ૩ ઈચ કરતાં વધુ વરસાદ નોંધાયો છે. જ્યારે રાજ્યના ૭ તાલુકામાં બે ઈંચથી વધુ, ૧૨ તાલુકામાં ૧ ઈંચથી વધુ જ્યારે, ૭૨ તાલુકામાં એક ઈંચ કરતા ઓછો વરસાદ નોંધાયો છે.

ભારે વરસાદને પગલે એનડીઆરએફની ૧૩, એસડીઆરએફની ૨૦ ટીમ તહેનાત કરવામાં આવી છે. ભારે વરસાદના પગલે ભાવનગરમાંથી ૮૯, અમરેલીમાંથી ૬૯, બોટાદમાંથી ૨૪, ગાંધીનગરમાંથી ૭ લોકોનું રેસ્ક્યુ કરાયું છે. બીજી તરફ ભાવનગરથી ૭૨૯, સુરેન્દ્રનગરથી ૧૧૭, બોટાદથી ૧૧૭ અને અમરેલીથી ૮૦ને સ્થળાંતરિત કરવામાં આવ્યા છે. ૧૯મી જૂનના બપોરની સ્થિતિએ સુરેન્દ્રનગરના ૩, આણંદના ૧ એમ ચાર સ્ટેટ હાઈવે, જ્યારે ભાવનગરના ૧ નેશનલ હાઇવે સહિત ૧૯૬ રસ્તા વાહન વ્યવહાર માટે બંધ છે. જેમાં ભાવનગરના સૌથી વધુ ૬૦, વલસાડના ૪૯ રસ્તાઓ બંધ છે.

ગુજરાતના ૨૦૬ જળાશયોમાં હાલ ૪૧ ટકા જળસંગ્રહ છે. જેમાં ૧૫ હાઇ એલર્ટ, ૧૦ એલર્ટ અને ૯ વોર્નિંગ હેઠળ છે. ૯ જળાશયો જે ૧૦૦ ટકા ભરાઇ ગયા છે, તેમાં અમરેલીના ધાતરવાડી-સુરજવાડી, ભાવનગરના રોજકી-બાગડ, બોટાદના ભીમાદ, સુરેન્દ્રનગરના વાંસલ-લિમ ભોગાવો-સબુરી-ધોળી ધજાનો સમાવેશ થાય છે.

જો આપને આ પોસ્ટ ગમી હોય તો શેર કરો...