દિગ્જામ સર્કલ પાસે તૈયાર કપડાની દુકાનમાંથી ૧૪૦ નંગ પેન્ટ-શર્ટની ચોરી

Author: નોબત સમાચાર

દિગ્જામ સર્કલ પાસે તૈયાર કપડાની દુકાનમાંથી ૧૪૦ નંગ પેન્ટ-શર્ટની ચોરી

હિંગળાજ માતાના મંદિરમાં પણ ખાતર પડ્યુંઃ

જામનગર તા. ૧૨ઃ જામનગરના દિગ્જામ સર્કલ પાસે આવેલી તૈયાર કપડાની દુકાનમાં બે સપ્તાહ પૂર્વે શટર ઉંચકાવી તસ્કરે ૧૪૦ નંગ પેન્ટ તથા ૧૨ શર્ટની ચોરી કરી હતી. જ્યારે ગઈરાત્રે સરૃ સેક્શન રોડ પર હિંગળાજ માતાના મંદિરમાં ત્રાટકેલા તસ્કરે દાનપેટીમાંથી રોકડ રકમની ઉઠાંતરી કરી છે.

જામનગરના સત્યમ્ કોલોની વિસ્તારમાં આવેલા શિવરંજની એપાર્ટમેન્ટમાં રહેતા અને દિગ્જામ સર્કલ નજીક રાજ કલેક્શન નામની તૈયાર કપડાની દુકાન ચલાવતા કૈલેશભાઈ ગુલાબચંદ માલદે નામના આસામીની દુકાનમાં ગઈ તા.૨૮ની રાત્રિના સમયે કોઈ તસ્કર ઘૂસ્યો હતો.

આ શખ્સે રાત્રિના દસ વાગ્યાથી સવારના આઠ વાગ્યા દરમિયાન દુકાનનું શટર ઉંચકાવી નાખી અંદર પ્રવેશ મેળવ્યા પછી વેચાણ માટે રાખવામાં આવેલા પેન્ટના જથ્થામાંથી ૧૪૦ નંગ પેન્ટ તથા ૧૨ શર્ટ ઉસેડી લીધા હતા. ત્યારપછી આ શખ્સ નાસી ગયો હતો. ચોરીની ગઈકાલે કૈલેશભાઈએ સિટી-સી ડિવિઝન પોલીસ સ્ટેશનમાં ફરિયાદ નોંધાવી છે. પોલીસે રૃા.૭૦ હજારના રેડીમેઈડ કપડા ચોરી જવા અંગે અજાણ્યા તસ્કર સામે આઈપીસી ૩૮૦, ૪૫૪, ૪૫૭ હેઠળ ગુન્હો નોંધ્યો છે.

જામનગરના સરૃ સેક્શન રોડ પર આવેલી રાજ૫ૂત સમાજની વાડીવાળી શેરીમાં હિંગળાજ માતાના તથા શરણેશ્વર મહાદેવ મંદિરમાં ગઈરાત્રે કોઈ તસ્કરો ઘૂસી ગયા હતા. તસ્કરોએ મંદિરની દાનપેટી ખોલી નાખી તેમાંથી રોકડ રકમની ચોરી કરી છે. ચોરીની આજે સવારે જાણ થતાં પોલીસને વાકેફ કરવામાં આવી છે. સિટી-સી ડિવિઝનના પીઆઈ એ.આર. ચૌધરી તથા સ્ટાફ દોડી ગયા હતા. પોલીસે ત્યાં આજુબાજુના મકાનોમાં મુકવામાં આવેલા સીસીટીવી કેમેરા ચકાસવા સહિતની કાર્યવાહી હાથ ધરી છે.

જો આપને આ પોસ્ટ ગમી હોય તો શેર કરો...