Author: નોબત સમાચાર
લાલપુર બાયપાસ પાસે અજાણ્યા વાહનની ઠોકરથી બાઈક પર જતું દંપતી થયું ખંડિત
ગંભીર ઈજા પામેલા મહિલાનું મૃત્યુઃ પતિ સારવારમાં:
જામનગર તા. ર૯: જામનગરના લાલપુર બાયપાસ પાસે ગઈકાલે સવારે એક બાઈકને અજાણ્યા વાહને ઠોકર મારતા બાઈક પર જઈ રહેલા દંપતી પૈકીના મહિલાનું ગંભીર ઈજા થવાથી મૃત્યુ નિપજ્યું છે. મૃતકના પુત્રએ હિટ એન્ડ રનના આ બનાવની પોલીસમાં ફરિયાદ નોંધાવી છે.
જામનગરના કાલાવડ નાકા બહાર આવેલા મોરકંડા રોડ પર જંગલીપીર વાડી વિસ્તારમાં વસવાટ કરતા જીવાભાઈ નકુમ નામના સતવારા પ્રૌઢ તથા તેમના પત્ની જયાબેન મંગળવારે ખંભાળિયામાં તેમના પરિવાર માં યોજાયેલા એક પ્રસંગમાં ભાગ લેવા માટે જીજે-૧૦-ડીકયુ ૧૫૭૫ નંબરના બાઈક પર ગયા હતા.
પ્રસંગ પૂર્ણ થયા પછી ગઈકાલે સવારે આ દંપતી બાઈક પર જામનગર આવવા માટે નીકળ્યું હતું. તેઓ જ્યારે સવારે દસેક વાગ્યે જામનગર નજીક લાલપુર બાયપાસ પાસે પહોંચ્યા ત્યારે તેઓને કોઈ અજાણ્યા વાહને ઠોકર મારી દીધી હતી. બાઈક પરથી ફંગોળાયેલા જીવાભાઈ તથા પાછળ બેસેલા તેમના પત્ની જયાબેનને માથા સહિતના શરીરના અન્ય ભાગોમાં ગંભીર ઈજા થઈ હતી.
આ વેળાએ ત્યાં હાજર કોઈ વ્યક્તિએ ૧૦૮ને જાણ કરતા એમ્બ્યુલન્સ દોડી આવી હતી. બંને ઈજાગ્રસ્તને સારવારમાં જી.જી. હોસ્પિટલ ખસેડાયા પછી જયાબેનનું મૃત્યુ નિપજ્યાનું ફરજ પરના તબીબે જાહેર કર્યું હતું. જીવાભાઈને હાલમાં સારવાર આપવામાં આવી રહી છે. તેમના પુત્ર નવીનભાઈ નકુમે પંચકોશી બી ડિવિઝન પોલીસ સ્ટેશનમાં અજાણ્યા વાહનના ચાલક સામે ફરિયાદ નોંધાવી છે.
જો આપને આ પોસ્ટ ગમી હોય તો શેર કરો...
Follow us: આ જ પ્રકારની બીજી પોસ્ટ માટે અમારી એપ ડાઉનલોડ કરો.
Android: https://rb.gy/surhtv
Apple ios: https://rb.gy/cee4r9
Social Media
ફોટો સ્ટોરી માટે અમારા ઇન્સ્ટાગ્રામ પેઈજને ફોલ્લો કરો
https://www.instagram.com/nobatdaily?r=nametag
વિડિયો માટે અમારી યુ-ટ્યૂબ ચેનલને સબસ્ક્રાઈબ કરો
https://youtube.com/@Nobatofficial
અન્ય સમાચારો
