હાલારમાં ઠંડી વધીઃ ન્યુનત્તમ ૧૩ ડીગ્રી

Author: નોબત સમાચાર

હાલારમાં ઠંડી વધીઃ ન્યુનત્તમ ૧૩ ડીગ્રી

તેજીલા વાયરાઓના પગલે તાપમાન ૧ ડીગ્રી ઘટતા

જામનગર તા. ૭: જામનગરમાં આજે સવારે પૂરા થતાં ચોવીસ કલાક દરમિયાન એક ડિગ્રીના ઘટાડા સાથે લઘુતમ તાપમાન ૧૩ ડીગ્રી નોંધાયું હતું. ઉત્તર ભારતમાંથી આવતા તેજીલા ઠંડા વાયરા અને તાપમાનમાં થયેલા ઘટાડાના પગલે હાલાર પંથકમાં ઠંડીમાં વધારો થયો છે. ઠંડી સામે રક્ષણ મળે તે માટે પ્રજાજનોએ ગરમ વસ્ત્રો તથા તાપણાનો સહારો લીધો હતો.

જમ્મુ-કાશ્મીર, લદ્દાખ, ઉત્તરાખંડ તથા હિમાચલ પ્રદેશમાં હિમવર્ષાનો દોર યથાવત્ રહ્યો છે. તાપમાનનો પારો માઈનસમાં ચાલ્યો જતા કડકડતી ઠંડી પડી રહી છે. બરફવર્ષાના પગલે ઘણી જગ્યાએ માર્ગો બંધ થતાં જનતાની હાડમારીમાં વધારો થયો છે.

ઉત્તરભારતમાં થઈ રહેલ હિમવર્ષાની અસર ગુજરાતમાં પણ વર્તાઈ રહી છે. રાજ્યમાં ઠંડીમાં વધારો થઈ રહ્યો છે. હિમાલય પરથી આવતા ઠંડા અને તેજીલા વાયરાઓના પગલે સમગ્ર હાલાર પંથકમાં તિવ્ર ઠંડી અનુભવાઈ રહી છે. ખાસ કરીને નગરસીમ અને ગ્રામ્ય વિસ્તારો તથા ધોરીમાર્ગો પર ઠંડી વધારે અનુભવાઈ રહી છે.

જામનગરમાં હાલ તાપમાનમાં વધારા-ઘટાડાનો દોર ચાલી રહ્યો છે. એક દિવસ તાપમાન વધે છે તો બીજા દિવસે તેમાં ઘટાડો થાય છે. આ દોર ગઈકાલે પણ યથાવત્ રહ્યો હતો. આજે સવારે પૂરા થતાં ચોવીસ કલાક દરમિયાન ૧ ડીગ્રીના ઘટાડા સાથે ન્યુનત્તમ તાપમાન ૧૩ ડીગ્રી અને મહત્તમ તાપમાન રપ.પ ડીગ્રી નોંધાયું હતું. પવનની ગતિ વધીને પ્રતિકલાકની સરેરાશ રપ થી ૩૦ કિ.મી.ની રહેવા પામી હતી. પવનની ગતિમાં થયેલા વધારા અને તાપમાનમાં ઘટાડો થતા ખાસ કરીને ગઈકાલે સાંજથી આજે વહેલી સવાર સુધી વધારે ઠંડી અનુભવાઈ હતી. જામનગર ઠંડુગાર થઈ ગયું છે. ઠંડી સામે રક્ષણ મળે તે માટે નગરજનોએ ગરમ વસ્ત્રો તથા ગરમ પીણા અને તાપણનો સહારો લીધો હતો. વાતાવરણમાં ભેજનું પ્રમાણ ૧૦ ટકા ઘટીને ૬૭ ટકા રહ્યું હતું.

જો આપને આ પોસ્ટ ગમી હોય તો શેર કરો...