યાત્રાધામ દ્વારકાના જગતમંદિરની ચોતરફ જાહેર શૌચાલય-મૂતરડી બનાવવા કોર્પોરેટરની રજૂઆત

Author: નોબત સમાચાર

યાત્રાધામ દ્વારકાના જગતમંદિરની ચોતરફ જાહેર શૌચાલય-મૂતરડી બનાવવા કોર્પોરેટરની રજૂઆત

આશરે ૫૦૦ મીટરના વર્તુળમાં આ વ્યવસ્થા નહીં હોવાથી યાત્રીકો હેરાન-પરેશાન

દ્વારકા તા. ૭: દ્વારકાધીશ મંદિર આસપાસ યાત્રીકોની સુખાકારી હેતુ ટોયલેટ/ યુરિનલની વ્યવસ્થા ઉભી કરવા કારોબારી સભ્ય દ્વારા દ્વારકા નગરપાલિકાને રજૂઆત કરવામાં આવી હતી. આ મુદ્ે નગરપાલિકાના જનરલ બોર્ડમાં ચર્ચાયો હતો.

યાત્રાધામ દ્વારકામાં દર વર્ષે દ્વારકાધીશના દર્શનાર્થે લાખો શ્રદ્ધાળુઓ આવતાં હોય જગતમંદિર આસપાસ હાલમાં ટોયલેટ/યુરિનલની વ્યવસ્થા ન હોય યાત્રીકોની સુખાકારી માટે દ્વારકા નગરપાલિકાની કારોબારી સમિતિના સભ્ય અંકિત સામાણી દ્વારા પાલિકાને સુવિધા ઉપલબ્ધ કરાવવા રજૂઆત કરવામાં આવી છે.

દ્વારકા નગરપાલિકાની કારોબારી સમિતિના સભ્ય અને વોર્ડ નં. ૭ ના ચૂંટાયેલ સદસ્ય અંકિત સામાણી દ્વારા ગઈકાલે નગરપાલીકાના જનરલ બોર્ડ દરમ્યાન ઉકત રજૂઆત કરતા જણાવેલ કે દ્વારકામાં દર વર્ષે લાખો શ્રધ્ધાળુઓ જગતમંદિરે કાળિયા ઠાકોરના દર્શનાર્થે આવતા હોય આમ છતાં જગતમંદિર આસપાસના અંદાજિત ૫૦૦ મીટરના ક્ષેત્રમાં યાત્રીકો માટે ટોયલેટ/યુરિનલની વ્યવસ્થા હાલ લાંબા સમયથી ઉપલબ્ધ નથી. જેના કારણે યાત્રીકોને ભારે સમસ્યા થાય છે. જગતમંદિરના યાત્રાળુઓના ભીડભાડવાળા વિસ્તારોમાં જે પહેલા ટોયલેટ/યુરિનલની સુવિધા ઉપલબ્ધ હતી તે પણ સમયાંતરે સ્વચ્છતા અથવા ટ્રાફીક યા અન્ય કારણોસર દૂર કરવામાં આવી હોય યાત્રાધામમાં જગતમંદિરે આવતા યાત્રાળુઓને પાયાની સુવિધા મળતી ન હોય વ્યાપક પરેશાનીનો સામનો કરવો પડી રહયો છે. હાલમાં સ્મશાન પાસે એક સુલભ સુવિધા નિર્માણાધીન છે જે પણ મંદિરથી ખૂબ દૂર છે.

આથી જગતમંદિર આસપાસ યાત્રીકોના ભીડભાડવાળા વિસ્તારો, ગોમતી ઘાટ, શાક માર્કેટ, પાર્કિંગ સહિતના સ્થળો પર યાત્રીકોની સુખાકારી માટે નવા ટોયલેટ/યુરિનલની વ્યવસ્થા કાયમી ધોરણે અથવા તો મોબાઈલ વાનની સુવિધા કરવામાં આવે તેમજ હાલમાં શહેરના અન્ય ભાગોમાં આવેલ મુતરડી/ટોયલેટ બ્લોકની હાલત પણ નિયમિત સફાઈના અભાવે બિસ્માર અને ગંદકીભરી હોય જેની પણ તાત્કાલીક ધોરણે સફાઈ કરી, નિયમિત સ્વચ્છતા જાળવવામાં આવે તો યાત્રીકોને ફરવા લાયક અને સ્થાનીકોની સમસ્યાનો નિકાલ આવે તેમ હોય, આ અંગે યોગ્ય કાર્યવાહી કરવામાં આવે તેવી રજૂઆત કરાઈ છે.

જો આપને આ પોસ્ટ ગમી હોય તો શેર કરો...