નકલી ડિગ્રી-માર્કશીટ બનાવી આપી ઠગાઈ કરતા નગરના શખ્સની મુંબઈ એરપોર્ટ પરથી અટકાયત

Author: નોબત સમાચાર

નકલી ડિગ્રી-માર્કશીટ બનાવી આપી ઠગાઈ કરતા નગરના શખ્સની મુંબઈ એરપોર્ટ પરથી અટકાયત

દસેક વર્ષથી કૃત્ય આચરતો હોવાની કબૂલાતઃ

જામનગર તા. ૭: મુંબઈ એરપોર્ટ પર રવિવારની રાત્રે બેંગ્કોકની ફલાઈટ પરથી ઉતરેલા જામનગરના એક શખ્સની ઈમીગ્રેશન તપાસ દરમિયાન આ શખ્સ પોતાના સાગરિતો સાથે મળી છેલ્લા દસ વર્ષથી નકલી ડિગ્રી અને માર્કશીટનો વેપલો કરતો હોવાનું બહાર આવ્યું છે. વિદેશમાં અભ્યાસ કે નોકરી માટે જવા ઈચ્છતા યુવાનો સાથે આ શખ્સ દસ વર્ષથી છેતરપિંડી આચરતો હતો.

મુંબઈમાં સહાર એરપોર્ટ પર રવિવારની રાત્રે અઢી વાગ્યે બેંગ્કોકથી આવેલી એક ફલાઈટમાંથી જામનગરનો પ્રથમેશ મણીયાર ઉતર્યા પછી ઈમીગ્રેશન ક્લિયરન્સમાં હતો ત્યારે તેણે પોતાનો પાસપોર્ટ તથા બોર્ડિંગ પાસ રજૂ કર્યા હતા. આ શખ્સને ફરજ પરના હાજર અધીકારીએ ઓળખ અને વ્યવસાય અંગે પૂછપરછ કરતા આ શખ્સ થોથવાઈ ગયો હતો.

આ શખ્સની ઘનિષ્ઠ પૂછપરછ કરાતા વિદેશમાં અભ્યાસ કરવા જવા ઈચ્છતા વિદ્યાર્થીઓને વિવિધ યુનિવર્સિટીઓના બનાવટી ડિગ્રી પ્રમાણપત્ર, માર્કશીટ વગેરે બનાવી આપવાનું એજન્ટ તરીકે આ શખ્સ કામ કરી છેલ્લા ૧૦ વર્ષથી આ રેકેટ ચલાવવા ઉપરાંત વિદેશમાં નોકરી અપાવવાના નામે પણ છેતરપિંડી કરી હોવાનું કબૂલ્યું છે.

જામનગરના આ શખ્સની અટકાયત કરી ઘનિષ્ઠ બનાવાયેલી પૂછપરછમાં તેણે પ્રતિ વિદ્યાર્થી રૂ।.૫૦ હજારથી રૂ।.ર લાખ સુધી વસૂલી પોતાના સાગરિત કે જેઓ રાજસ્થાન, ગોપાલ, હરીયાણા અને નવી દિલ્હીના છે તેની સાથે મળી આ કૌભાંડ આચર્યાનું કબૂલ્યું છે. તેની પાસેથી મળેલા મોબાઈલમાંથી બનાવટી દસ્તાવેજની અનેક પીડીએફ પણ મળી આવી છે.

જો આપને આ પોસ્ટ ગમી હોય તો શેર કરો...