ખેતરના શેઢે કાંટાળી વાડ તથા પથ્થર હટાવવાનું કહેતા ધ્રાંગડામાં ખેડૂત પર હુમલો

Author: નોબત સમાચાર

ખેતરના શેઢે કાંટાળી વાડ તથા પથ્થર હટાવવાનું કહેતા ધ્રાંગડામાં ખેડૂત પર હુમલો

મોટર સીઝ કરવા આવેલા શખ્સોએ અપમાનિત કર્યાઃ

જામનગર તા. ૭: જામનગરના ધ્રાંગડામાં એક ખેડૂતે માર્ગમાં અડચણરૂપ થતી કાંટાળી વાડ અને પથ્થર હટાવવાનું કહેતા બે શખ્સે તેમના પર હુમલો કરી આંગળી ભાંગી નાખી હતી. જ્યારે ધ્રોલ પાસે મોરબીના એક આસામીની મોટર સીઝ કરી જવા આવેલા ત્રણ શખ્સે માર મારી આ આસામીને જ્ઞાતિ પ્રત્યે હડધૂત કર્યા હતા.

જામનગર તાલુકાના ધ્રાંગડા ગામમાં રહેતા ખેડૂત રમેશભાઈ થોભણભાઈ ભાલોડીયા નામના પ્રૌઢ સોમવારે સવારે પોતાના ખેતરે જતા હતા ત્યારે માર્ગમાં પરેશ ગોવિંદભાઈ ગડારા અને પ્રફુલ ગોવિંદભાઈ ગડારા નામના બે વ્યક્તિ પોતાના ખેતરના શેઢા નજીક ઉભા હતા.

ત્યાં જઈ રમેશભાઈએ તમારા ખેતરના શેઢે કાંટાળી વાડ કરેલી છે અને મોટા પથ્થર રાખ્યા છે તેના કારણે આ વિસ્તારના તમામ ખેડૂતોને આવવા જવામાં તકલીફ પડે છે તેમ કહેતા થયેલી બોલાચાલી પછી પરેશ તથા પ્રફુલે ગાળો ભાંડી હુમલો કર્યાે હતો અને ઢીકાપાટુથી માર માર્યાે હતો જેમાં પરેશે ત્યાં પડેલો પથ્થર ઉપાડી રમેશભાઈના હાથમાં ઝીંકતા તેઓની ટચલી આંગળીમાં ફ્રેક્ચર થયું છે. પંચકોશી એ ડિવિઝનમાં તેની ફરિયાદ કરાઈ છે.

મોરબીમાં આંબેડકર કોલોનીમાં રોહિદાસપરામાં રહેતા રવિભાઈ મનુભાઈ સારેસા ઉર્ફે કારાભાઈ સોમવારે બપોરે ધ્રોલ નજીક રાધેશ્યામ હોટલ પાસે જીજે-૩૬-એસી ૪૬૧૦ નંબરની મોટર લઈને આવ્યા પછી ત્યાં ધસી આવેલા લાલભા સુખુભા, એક અજાણ્યા શખ્સે રવિભાઈના પિતાના નામે રહેલી આ મોટરના હપ્તા ચઢી ગયા છે, મોટર લઈ જવી પડશે તેમ કહી ફાયનાન્સ કંપનીના સીઝર તરીકેની ઓળખ આપી બળપૂર્વક મોટર પડાવી લીધા પછી રવિભાઈને જ્ઞાતિ પ્રત્યે હડધૂત કરી ગાળો ભાંડવા ઉપરાંત ઢીકાપાટુથી માર મારવામાં આવ્યો હતો. ધ્રોલ પોલીસ સ્ટેશનમાં એટ્રોસિટી એક્ટ તથા બીએનએસની કલમો હેઠળ ફરિયાદ કરાઈ છે.

જો આપને આ પોસ્ટ ગમી હોય તો શેર કરો...