કાલાવડના મોટી માટલી પાસે ઈકો અને ટ્રેક્ટર વચ્ચે અકસ્માતમાં ત્રણના મૃત્યુ

Author: નોબત સમાચાર

કાલાવડના મોટી માટલી પાસે ઈકો અને ટ્રેક્ટર વચ્ચે અકસ્માતમાં ત્રણના મૃત્યુ

અન્ય બે સજાગ્રસ્તને સારવારમાં ખસેડાયાઃ મસીતિયા ગામના મુસ્લિમ અગ્રણીના મૃત્યુથી શોકઃ

જામનગર તા. ૨ઃ કાલાવડના મોટી માટલી ગામ પાસે ગઈરાત્રે ઈકો મોટર તથા ટ્રેક્ટર વચ્ચે સર્જાયેલા અકસ્માતમાં મસીતિયા ગામના મુસ્લિમ સમાજના અગ્રણી તથા અન્ય બે વ્યક્તિના ગંભીર ઈજા થવાથી બે મૃત્યુ નિપજ્યા છે. જ્યારે અન્ય બેને સારવારમાં ખસેડવામાં આવ્યા છે. અકસ્માતની જાણ થતાં ઘટનાસ્થળે ૧૦૮ ધસી આવી હતી. જ્યારે જી.જી. હોસ્પિટલમાં મોડીરાત્રે મુસ્લિમ અગ્રણીઓ આવી પહોંચ્યા હતા. મૃતક અગ્રણી પોતાના પરિવાર સાથે ધોરાજીથી પરત ફરતા હતા.

જામનગર-કાલાવડ ધોરીમાર્ગ પર આવેલા મોટી માટલી પાસે ગઈકાલે રાત્રે જીજે-૧૦-ડીએન ૭૨૬૪ નંબરની ઈકો મોટર તથા ટ્રેક્ટર વચ્ચે ધડાકાભેર અકસ્માત સર્જાયો હતો. ઈકો મોટરમાં મુસાફરી કરી રહેલા જામનગર નજીકના મસીતિયા ગામના સૈયદ આમનશાબાપુ સીદીકમિંયાબાપુ મટારી સહિતના ત્રણ વ્યક્તિના ગંભીર ઈજા થવાથી ઘટનાસ્થળે જ કમકમાટીભર્યા મૃત્યુ નિપજ્યા હતા. જ્યારે બે વ્યક્તિને ગંભીર ઈજા પહોંચી હતી.

ઉપરોક્ત અકસ્માતની જાણ થતાં મોટી માટલી ગામના રહેવાસીઓ દોડી આવ્યા હતા. કોઈએ ૧૦૮ તથા પોલીસને જાણ કરતા એમ્બ્યુલન્સ દોડી આવી હતી. જેના સ્ટાફે મોટરમાંથી સૈયદ આમનશાબાપુ તેમજ સૈયદ આબેદામા તથા સૈયદ ઝેનબમા નામના વ્યક્તિઓના મૃતદેહ બહાર કાઢ્યા હતા અને વધુ બે ઈજાગ્રસ્ત વ્યક્તિ અંદરથી મળી આવતા તેઓને સારવાર માટે જામનગરની જી.જી. હોસ્પિટલમાં ખસેડવાની તજવીજ કરી હતી. ઉપરોક્ત અકસ્માતની વિગતો મળતા જામનગર તેમજ મસીતિયાના અગ્રણીઓ જી.જી. હોસ્પિટલમાં ધસી આવ્યા હતા. જ્યાં સૈયદ આમનશાબાપુનું અકસ્માતમાં નિધન થયાની જાણ થતાં શોકની લાગણી પ્રસરી હતી.

ઉપરોક્ત અકસ્માત અંગે વધુ જાણવા મળ્યા મુજબ મસીતિયા ગામના મુસ્લિમ સમાજના અગ્રણી સૈયદ આમનશા બાપુ તથા તેમનો પરિવાર ગઈકાલે ધોરાજીથી મસીતિયા પરત જવા માટે ઈકો મોટરમાં રવાના થયો હતો. તે પછી રાત્રે દસેક વાગ્યે તેઓની મોટર અને ટ્રેક્ટર વચ્ચે મોટી માટલી ગામ નજીક અકસ્માત સર્જાયો હતો. અકસ્માતમાં ઈકો મોટરનુું પડીકુ વળી ગયું હતું. અકસ્માતના સ્થળે ધસી આવેલી પોલીસ ટીમે કાર્યવાહી હાથ ધરી હતી.

જો આપને આ પોસ્ટ ગમી હોય તો શેર કરો...