ધ્રોલના લતીપરમાં રાજ્યના કૃષિમંત્રી રાઘવજીભાઈ પટેલે સ્થળ સફાઈ કરી

Author: નોબત સમાચાર

ધ્રોલના લતીપરમાં રાજ્યના કૃષિમંત્રી રાઘવજીભાઈ પટેલે સ્થળ સફાઈ કરી

મહાશ્રમદાન કાર્યક્રમ હેઠળ

જામનગર તા. ર ઃ ધ્રોલ તાલુકાના લતીપર ગામે એક તારીખ, એક કલાક સુત્ર સાથે કૃષિ મંત્રી શ્રી રાઘવજીભાઈ પટેલની ઉપસ્થિતિમાં મહાશ્રમદાન કાર્યક્રમ યોજાયો હતો. જેમાં દેશને સિંગલ યુઝ પ્લાસ્ટિક ફ્રી કરી સ્વચ્છ અને સ્વસ્થ ભારતના નિર્માણમાં સહભાગી જવા મંત્રીને આહવાન કર્યું હતું. જિલ્લાના આરોગ્ય કેન્દ્રો, આંગણવાડીઓ, શાળાઓ, પ્રવાસન સ્થળો, ગૌ શાળાઓ, બસ સ્ટેન્ડ, ધાર્મિક સથળો સહિતની જગ્યાઓએ સ્વચ્છતા અભિયાનનું આયોજન કરાયું હતું.

ધ્રોલ તાલુકાના લતીપર ગામે માધ્યમિક શાળા પાસે એક તારીખ, એક કલાક સુત્ર સાથે કૃષિ મંત્રી રાઘવજીભાઈ પટેલ સહિતના મહાનુભાવોની ઉપસ્થિતિમાં મહાશ્રમદાન કાર્યક્રમનું આયોજન કરવામાં આવ્યું હતું. જેમાં કૃષિમંત્રીએ સ્થળની સાફ-સફાઈ કરી સ્વચ્છ ભારત અભિયાનમાં સહભાગી થવા ઉપસ્થિત સૌને આહવાન કર્યું હતું.

તેમણે જણાવ્યું હતું કે સ્વચ્છ ભારત મિશન અંતર્ગત મહાત્મા ગાંધીજીની જન્મ જયંતીને સ્વચ્છતા થકી જન આંદોલન તરીકે યોજવા સ્વચ્છ ભારત દિવસ તરીકે ઉજવવામાં આવે છે. સ્વચ્છતા હી સેવા માસની ઉજવણી અન્વયે વડાપ્રધાન શ્રી નરેન્દ્ર મોદીની પ્રેરણાથી પહેલી ઓકટોબર-ર૦ર૩ ના દિવસે દેશના તમામ વિસ્તારોમાં જન પ્રતિનિધિઓની આગેવાની હેઠળ એક તારીખે એક કલાક સુત્ર સાથે મહાશ્રમદાન પ્રવૃત્તિનું આયોજન કરવામાં આવેલ છે.

ગાર્બેજ ફ્રી ઈન્ડિયાની થીમ સાથે ગામો કચરા મુકત બને તે માટે એક તારીખ, એક કલાક અન્વયે મહાશ્રમદાન કરી સમગ્ર જિલ્લાના આરોગ્ય કેન્દ્રો, આંગણવાડીઓ, શાળાઓ, પ્રવાસન સ્થળો, ગૌશાળાઓ, બસ સ્ટેન્ડ, ધાર્મિક સ્થળો તેમજ ગામના જાહેર સ્થળો કે જ્યાં કચરો નાખવામાં આવતો હોય તેવી જગ્યાઓને સ્વચ્છ કરવાનું અભિયાન હાથ ધરવામાં આવ્યું છે.

મહાશ્રમદાન થકી સિંગલ યુઝ પ્લાસ્ટિક ફ્રી અને ઝીરો વેસ્ટને પ્રોત્સાહન મળે તે પ્રકારનો મુખ્ય અભિગમ રહેલ છે. ત્યારે આ અભિયાનમાં સ્વૈચ્છિક રીતે જોડાઈ શ્રમદાન કરી આપણું ગામ, તાલુકો અને જિલ્લો તેમજ આપણા દેશને સિંગલ યુઝ પ્લાસ્ટિક ફ્રી કરી સંપૂર્ણ સ્વસ્થ, સ્વચ્છ બનાવવા મંત્રીએ આહવાન કર્યું હતું. આ મહાશ્રમદાન કાર્યક્રમમાં ધારાસભ્ય મેઘજીભાઈ ચાવડા, જિલ્લા ગ્રામ વિકાસ એજન્સીના નિયામક ચૌધરી, ધ્રોલ પ્રાંત અધિકારી, સાકરીયા તેમજ બહોળી સંખ્યામાં લતીપરના ગ્રામજનો વગેરે જોડાયા હતાં.

જો આપને આ પોસ્ટ ગમી હોય તો શેર કરો...