જામનગરના નયનરમ્ય રણમલ તળાવની મનપા તંત્રની બેદરકારીના કારણે દુર્દશા

Author: નોબત સમાચાર

જામનગરના નયનરમ્ય રણમલ તળાવની મનપા તંત્રની બેદરકારીના કારણે દુર્દશા

તળાવમાં ચારેતરફ ફરતા વિસ્તારોમાં વૃક્ષો-ઝાડી-ઝાંખરાઓનો જંગલો દૂર કરવાનું કોઈને ધ્યાને આવતું નથી!

જામનગર તા. ૧૦ઃ જામનગર મહાનગરપાલિકા દ્વારા દર વર્ષે મોડે મોડે જાગે અને પ્રિ-મોન્સુન કામગીરીની લાખો રૃપિયાના ખર્ચની જાહેરાત કરે... વરસાદ આવે તે પહેલા દર વર્ષે કેનાલો સહિતની વરસાદી પાણીના નિકાલની સફાઈ કામગીરીમાં લોટ પાણીને લાકડા જેવું કામ થતું હોવાની દર વર્ષે ફરિયાદો ઊઠવા પામે છે, કારણ કે એક-બે ઈંચ જેટલો મામુલી વરસાદ પડે તો પણ શહેરમાં ચારેતરફ પાણી ભરાય જાય છે.

આ તો થઈ પ્રિ-મોન્સુન કામગીરીની વાત... પણ શહેરની મધ્યમાં આવેલા એક માત્ર હરવાફરવાના સ્થળ એવા નયનરમ્ય રણમલ તળાવની જાળવણીમાં પણ મનપાનું તંત્ર સદંતર નિષ્ક્રિય અને બેજવાબદાર જ રહ્યું છે.

કોરોનાકાળથી આજ સુધી આ તળાવમાં ક્યારે ય સઘન સફાઈ થઈ નથી, કોઈ કોઈ સંસ્થાવાળા અને પર્યાવરણ પ્રેમીઓ દ્વારા એકાદ-બે દિવસ સફાઈ કામ કરાય છે પણ તે કામમાં સમગ્ર તળાવની સફાઈ થતી નથી તે હકીકત છે. અત્યારે આ તળાવમાં પાણીનું સ્તર ઘટી ગયું છે. વરસાદના નવા પાણીની આવક થનાર છે ત્યારે તળાવમાં ચારેતરફ અંદરના ભાગે વૃક્ષો-ઝાડી-ઝાંખરા ઉગીને ઉછરી રહ્યા છે. મોટાભાગના વિસ્તારોમાં તો તળાવમાં જંગલ જેવી સ્થિતિ જોવા મળે છે.

મનપા તંત્રના સંલગ્ન વિભાગને તળાવમાંથી ઝાડ-ઝાડી-ઝાંખરા-કચરો, પથ્થરો દૂર કરવા માટે અલગથી બજેટ ફાળવવામાં આવે છે... પણ આ વિભાગની કામગીરી શૂન્ય જેવી હોવાના કારણે ઉપરની તસ્વીરોમાં દેખાય છે તેવી અત્યંત વરવી સ્થિતિ બની ગઈ છે. તળાવમાંથી આ ઉગી નીકળેલા તમામ ઝાડ-ઝાડી-ઝાંખરા અને કચરો તાકીદે દૂર કરવાની જરૃર છે. વરસાદી નવા પાણીની આવક થાય ત્યારે તળાવ પૂરી ક્ષમતાથી ભરાય, તળાવનું પાણી લાંબાસમય સુધી ચોખ્ખું રહે તે માટે આ કચરો યુદ્ધના ધોરણે સાફ કરવાની જરૂર છે.

મનપાના ચૂંટાયેલા પ્રતિનિધિઓ તેમજ મ્યુનિ. કમિશનર વિવિધ સ્થળોની મુલાકાતો લઈ રહ્યા છે ત્યારે તળાવની અંદર ફેલાયેલા જંગલનું નિરીક્ષણ કરી યોગ્ય અને ઝડપી કાર્યવાહી કરવાની જરૃર છે.

જો આપને આ પોસ્ટ ગમી હોય તો શેર કરો...