કપાસના ગેરકાયદે બિયારણની ૮૩ કોથળી પકડી પાડતી દ્વારકા એસઓજી

Author: નોબત સમાચાર

કપાસના ગેરકાયદે બિયારણની ૮૩ કોથળી પકડી પાડતી દ્વારકા એસઓજી

ચકાસણી માટે મોકલી આપવામાં આવ્યું બિયારણઃ

જામનગર તા.૧૦ ઃ કપાસનું વધુ ઉત્પાદન મેળવવા માટે કેટલાક ગેરકાયદેસરના બિયારણો બજારમાં આવી ગયા છે તેવી બાતમી પરથી ગઈકાલે દ્વારકા એસઓજીએ બે દુકાનમાં ચકાસણી કરતા આવા બિયારણની ૮૩ કોથળીઓ મળી આવી હતી. તે બિયારણ ચકાસણી માટે કબજે કરાયું છે.

ખેતીમાં વધુ ઉપજ મેળવવા ૪-જી અને ૫-જી કપાસના બિયારણનો વેપલો બજારમાં વધતો જઈ રહ્યો છે. પર્યાવરણને થતું નુકસાન નજર અંદાજ કરી આવા બિયારણો બજારમાં વધુને વધુ ખપી રહ્યા છે. ત્યારે દેવભૂમિ દ્વારકા એસઓજી દ્વારા ગઈકાલે ચકાસણી હાથ ધરાઈ હતી.

તે દરમિયાન ખંભાળિયા તાલુકાના કોઠાવિસોત્રી ગામના રામશીભાઈ ગોવાભાઈ ગોજીયા તથા જામનગરની ભાગોળે મધુરમ બંગ્લોઝમાં રહેતા દેશુરભાઈ કરશનભાઈ ભાટીયા નામના બે વેપારીએ આવા બિયારણનો જથ્થો બહારથી મંગાવી પોતાની દુકાનમાં રાખ્યો હોવાની બાતમી સ્ટાફના એન.ડી. રાઠોડ, વિજયસિંહ જાડેજાને મળતા પીઆઈ પી.સી. સીંગરખીયાને સાથે રાખી ખંભાળિયાના સલાયા ફાટક નજીક કનૈયા ખોળ-કપાસીયા નામની દુકાનમાં એસઓજીએ તપાસણી કરી હતી.

આ દુકાનમાંથી બોડીગાર્ડ ૪-જી નામના કપાસના બિયારણના ૬૯ બાચકા અને મિલન એગ્રો નામની દુકાનમાંથી પીંક પેન્થર ૪-જી પ્લસ નામના દસ બાચકા અને કેડિયમ ૫-જી લખેલા ચાર બાચકા મળી આવ્યા હતા. કુલ રૃા.૮૩ હજારનું બિયારણ કબજે કરી તેણે ચકાસણી માટે મોકલી આપવામાં આવ્યું છે.

જો આપને આ પોસ્ટ ગમી હોય તો શેર કરો...