જામનગરના શખ્સે સસરા પર ફેરવી દીધી જીપ

Author: નોબત સમાચાર

જામનગરના શખ્સે સસરા પર ફેરવી દીધી જીપ

રિસામણે ગયેલી પત્ની બંને સંતાનને પિયરે લઈ જતાં જમાઈ અકળાયોઃ

જામનગર તા.૧૦ ઃ જામનગરના એક શખ્સે ગઈકાલે રાજકોટના કાલાવડ રોડ પર આવેલા કણકોટ ગામના પાટિયા પાસે પોતાના સસરા પર થાર જીપ ફેરવી દીધી હતી. રિસામણે ગયેલી આ શખ્સની પત્ની જામનગર આવી પોતાના બંને સંતાનને પિતાના ઘેર લઈ જતાં ઉશ્કેરાયેલા શખ્સે પોતાના ત્રણ સાગરિત સાથે રાજકોટ આવી ઉપરોક્ત કૃત્ય કર્યું હતું.

રાજકોટ જિલ્લાના કણકોટ ગામના પાટિયા પાસે મફતીયાપરામાં રહેતા માલદેભાઈ કરશનભાઈ પાંડાવદરા નામના પ્રૌઢની પુત્રી સંધ્યાના લગ્ન દસેક વર્ષ પહેલા જામનગરના હિતેશ ચાવડા સાથે કરવામાં આવ્યા પછી આ દંપતીને પુત્ર તથા પુત્રીની પ્રાપ્તિ થઈ હતી. તે દરમિયાન પાંચેક મહિના પહેલા સંધ્યા તથા હિતેશ વચ્ચે ઝઘડો થઈ જતાં સંધ્યા રિસામણે ચાલી ગઈ હતી.

તે પછી ગઈકાલે સંધ્યાની પુત્રીનો જન્મદિવસ હોવાથી તેણી જામનગર પોતાની પુત્રીને લેવા માટે આવી હતી. જ્યાંથી પુત્ર તથા પુત્રીને સાથે રાખી સંધ્યા રાજકોટ પરત ચાલી જતાં ઘેર આવેલા પતિ હિતેશને જાણ થઈ હતી. તેથી પોતાના બંને સંતાન પરત લઈ આવવા માટે હિતેશ ગઈકાલે પોતાના મિત્ર વિક્કી ઉર્ફે ખાડા તથા અન્ય બે સાગરિત સાથે થાર જીપમાં રાજકોટ ધસી ગયો હતો. જ્યાં તેણે કાલાવડ રોડ પર આવેલા કણકોટના પાટિયા સસરાના ઘેર પહોંચી પોતાના સંતાન પરત લઈ જવા ધમાલ મચાવી દીધી હતી.

પોતાના બંને બાળકને જીપમાં બેસાડી દઈ હિતેશે જીપ ભગાડી હતી. આ વેળાએ સસરા માલદેભાઈ દોડી આવ્યા હતા. તેઓ વચ્ચે ઉભા રહી જતા જમાઈ હિતેશે તેમના પર પોતાની થાર જીપ ચઢાવી દીધી હતી અને સસરાને ચગદી નાખી જમાઈ પલાયન થઈ ગયો હતો.

જીપ ચઢી જતાં પગ તથા કમરમાં ઈજા પામેલા માલદેભાઈને સારવારમાં ખસેડવામાં આવ્યા છે. જ્યાંથી તેઓએ જમાઈ હિતેશ ચાવડા સામે પોલીસમાં ફરિયાદ નોંધાવી છે. પોલીસે ગુન્હો નોંધી જમાઈ સહિત ચાર આરોપીની શોધ શરૃ કરી છે.

જો આપને આ પોસ્ટ ગમી હોય તો શેર કરો...