ઉનની કંદોરીમાં બે ભાઈને પાડોશી શખ્સોએ ગાળો ભાંડી પતાવી દેવાની ધમકી આપી

Author: નોબત સમાચાર

ઉનની કંદોરીમાં બે ભાઈને પાડોશી શખ્સોએ ગાળો ભાંડી પતાવી દેવાની ધમકી આપી

રાજકોટના શખ્સે ફોન પર પતાવી દેવાની દાટી મારીઃ

જામનગર તા. ૬ઃ જામનગરના ઉનની કંદોરી વિસ્તારમાં બે મહિલા સાથે પાડોશી બંધુઓએ અશોભનીય વર્તન કર્યા પછી બે યુવાનને ગાળો ભાંડી સમજાવવા આવતા નહીં તેમ કહી પતાવી દેવાની ધમકી આપ્યાની પોલીસમાં ફરિયાદ કરાઈ છે. નગરના એક યુવાનને રાજકોટના શખ્સે ફોન પર પૈસાની ઉઘરાણી કરી જાનથી મારી નાખવા દાટી મારી હતી.

જામનગરના કિસાનચોક વિસ્તારથી આગળ આવેલા ગણેશવાસ નજીક ઉનની કંદોરી પાસે રહેતા એક મહિલા તથા તેમના દેરાણી ગઈ તા.૧૭ની બપોરે પોતાના ઘરે હતા ત્યારે પાડોશમાં રહેતા કાનજી દેવશીભાઈ વિંઝુડા ઉર્ફે કાના તથા જગદીશ દેવશીભાઈ વિંઝુડા નામના બે શખ્સ પોતાના ઘરની છત પર ગાળો બોલતા હતા.

આ શખ્સોને તે મહિલા તથા તેમના દેરાણીએ સમજાવટ કરતા કાનજીએ તે મહિલાઓ સામે અશોભનીય વર્તન કર્યું હતું તેની વાત આ મહિલાએ પોતાના પતિને કર્યા પછી હમીરભાઈ પરમાર અને તેમના ભાઈએ આમ ન કરવા જગદીશને કહ્યું હતું. તે પછી આ બંને ભાઈને કાનજી અને જગદીશે ગાળો ભાંડી જાનથી મારી નાખવાની ધમકી આપ્યાની પોલીસમાં ફરિયાદ કરાઈ છે.

જામનગરના પટેલ કોલોની વિસ્તારમાં આવેલી લાલબહાદુર શાસ્ત્રી સોસાયટીમાં રહેતા જીજ્ઞેશભાઈ ગુણવંતરાય ખેતીયા નામના યુવાનને બુધવારની રાત્રે રાજકોટના શબ્બીર નાગોરી નામના શખ્સે ફોન કર્યાે હતો.

ફોન કોલમાં શબ્બીરે જણાવ્યું હતું કે, તમારા પૈસા મેં મેરેજ બ્યુરોમાંથી પરત અપાવ્યા છે તેથી તમારે મને પૈસા આપવા પડશે. ચેક લઈને રાજકોટ આવી જાવ તેવી સૂચના અપાતા જીજ્ઞેશભાઈએ રાજકોટ આવવાની ના પાડતા શબ્બીર નાગોરીએ જાનથી મારી નાખવાની ધમકી આપી ગાળો ભાંડી હતી. સિટી બી ડિવિઝનમાં તેની ફરિયાદ કરાઈ છે.

જો આપને આ પોસ્ટ ગમી હોય તો શેર કરો...