લોનધારકના અવસાન પછી ક્લેઈમ રદ્દ કરનાર વીમા કંપનીને ફોરમની લપડાક

Author: નોબત સમાચાર

લોનધારકના અવસાન પછી ક્લેઈમ રદ્દ કરનાર વીમા કંપનીને ફોરમની લપડાક

રૃા.૩૧ લાખ વ્યાજ સાથે ચૂકવી આપવા આદેશઃ

જામનગર તા. ૬ઃ દ્વારકા જિલ્લાના એક આસામીએ હોમલોન લેતી વખતે મેળવેલી વીમા પોલિસી પછી લોનધારકનું અવસાન થયું હતું. લોન લેતી વખતે કહેવામાં આવ્યા મુજબ બાકી હપ્તા અંગે ક્લેઈમ કરાતા વીમા કંપનીએ તેને રદ્દ કર્યાે હતો. ગ્રાહક ફોરમમાં પહોંચેલા આ મામલામાં ફોરમે ક્લેઈમની રૃા.૩૧ લાખ ઉપરાંતની રકમ વ્યાજ સાથે ચૂકવવા વીમા કંપનીને આદેશ કર્યાે છે.

દેવભૂમિ દ્વારકા જિલ્લાના ધુતારપુર ગામના હેભાભાઈ ભીખાભાઈ ભોચીયા નામના આસામીએ હોમ ફર્સ્ટ ફાયનાન્સ કંપની પાસેથી રૃા.૩૧ લાખ ઉપરાંતની હોમલોન મેળવી હતી. તે વખતે કંપનીએ લોનની સાથે વીમો મેળવવા માટે હેભાભાઈને કહેતા અને ચાલુ લોને તેઓને કાંઈ થાય તો બાકીના હપ્તા ભરવા નહીં પડે તેમ જણાવતા હેભાભાઈએ વીમા પોલિસી મેળવી હતી.

ત્યારપછી હેભાભાઈને શારીરિક તકલીફ થતાં જામનગર, રાજકોટ અને ત્યાંથી અમદાવાદ હોસ્પિટલમાં ખસેડવામાં આવ્યા હતા. જ્યાં તેઓનું સારવાર દરમિયાન અવસાન થયું હતું. તેની જાણ વીમા કંપનીને કરવામાં આવતા ભારતી અક્સા લાઈફ ઈન્યુરન્સ કંપનીએ તે ક્લેઈમ નામંજૂર કર્યાે હતો. તેથી હેભાભાઈના પત્ની મંજુબેને ગ્રાહક તકરાર નિવારણ ફોરમમાં ફરિયાદ નોંધાવી હતી.

તે ફરિયાદ ચાલી જતાં ફરિયાદીના વકીલે દલીલ કરી હતી કે, પોલિસી કે ટર્મસ કંડીશન આપવામાં આવી ન હોય તો પણ ક્લેઈમ રજૂ થયા પછી વીમા કંપની ક્લેઈમ રદ્દ કરી શકે નહીં. ફોરમે તે દલીલ ગ્રાહ્ય રાખી પોલિસી મુજબની રૃા.૩૧ લાખ ઉપરાંતની રકમ છ ટકાના વ્યાજે યોગ્ય સમયમાં ચૂકવી આપવા અને જો તે સમયમાં રકમ ચૂકવવામાં ન આવે તો વાર્ષિક નવ ટકા વ્યાજ ગણી આ રકમ ચૂકવવા હુકમ કર્યાે છે અને ખર્ચ પણ ચૂકવી આપવા આદેશ કર્યાે છે. ફરિયાદી તરફથી વકીલ વસંત ગોરી, દીપક નાનાણી, નેહલ સંચાણીયા રોકાયા હતા.

જો આપને આ પોસ્ટ ગમી હોય તો શેર કરો...