પ્રેમલગ્ન કરનાર શખ્સે સાળાને છરી હુલાવી

Author: નોબત સમાચાર

પ્રેમલગ્ન કરનાર શખ્સે સાળાને છરી હુલાવી

મહિલા તથા તેમની પુત્રીને ધમકીઃ

જામનગર તા. ૧૯: જામનગરના બેડેશ્વર ઓવરબ્રિજ પાસે શનિવારે મહિલા તથા તેમના ૫ુત્રીને રોકી એક શખ્સે ગાળો ભાંડી ધમકી આપી હતી. જ્યારે કાલાવડમાં સાળા પર બનેવીએ છરીથી હુમલો કરી ઈજા પહોંચાડી હતી.

જામનગરના બેડીના ખારી વિસ્તાર નજીક આવેલા મોરલાવાડી ગોડાઉન પાછળ વસવાટ કરતા ખેરૂનબેન આઝાદભાઈ સાંઘાણી નામના મહિલા શનિવારે સવારે ખરીદી કરવા માટે ગાંધીનગર નજીક ભરાતી શનિવારી બજારમાં આવ્યા હતા.

જ્યાંથી તેઓ ખરીદી કરીને પુત્રી સુગરાબાનુ સાથે પરત ફરતા હતા ત્યારે માધાપર ભુંગામાં રહેતો નવાઝ ઉર્ફે ટાયડો નામનો શખ્સ આવ્યો હતો. તેણે બેડેશ્વર ઓવરબ્રિજ નજીક ખેરૂનબેન અને તેમની પુત્રીને રોકી હું તમારા ઘર પાસેથી નીકળું છું તો મારા પર શક કેમ કરો છો તેમ કહેતા ખેરૂનબેને મારા ઘરે દીકરીઓ છે, તું શું કામથી આંટાફેરા કરતો હોય છે તેમ પૂછતા નવાઝ ઉશ્કેરાયો હતો. તેણે ગાળો બોલવાનું શરૂ કરતા ખેરૂનબેન તથા સુગરાબાનુએ ગાળો ન બોલવાનું કહેતા આ શખ્સે તારા જમાઈને છરી મારી છે તેમ તને પણ જાનથી મારી નાખીશ તેવી ધમકી આપતા ખેરૂનબેને સીટી બી ડિવિઝન પોલીસ સ્ટેશનમાં ફરિયાદ નોંધાવી છે.

કાલાવડની ચમન ટેકરીમાં રહેતા સદામ ગફાર બારાડી નામના મેમણ યુવાનના બહેન સાથે જુનેદ ઝીકરભાઈ રાવ નામના શખ્સે પ્રેમલગ્ન કર્યા પછી ત્રાસ આપવાનું શરૂ કરતા તેની સામે પત્નીએ પોલીસમાં ફરિયાદ નોંેંધાવી હતી. તે બાબતનો ખાર રાખી ગઈકાલે રાત્રે સદામને રોકી લઈ બનેવી જુનેદે ઢીકાપાટુ તથા છરીથી હુમલો કરી પીઠમાં ઘા ઝીંકી દેતાં ઘવાયેલા આ યુવાનને સારવારમાં ખસેડાયો છે. પોલીસે તેની ફરિયાદ પરથી ગુન્હો નોંધ્યો છે.

જો આપને આ પોસ્ટ ગમી હોય તો શેર કરો...