મસીતિયાના યુવાન પર થયેલા હુમલાના ગુન્હામાં ચાર આરોપીના જામીન થયા મંજૂર

Author: નોબત સમાચાર

મસીતિયાના યુવાન પર થયેલા હુમલાના ગુન્હામાં ચાર આરોપીના જામીન થયા મંજૂર

બાવન જમાતના પ્રમુખની ઓફિસમાં બઘડાટી પછી

જામનગર તા.૧૮ ઃ જામનગરના કાલાવડ નાકા બહાર આવેલી મુસ્લિમ બાવન જમાનના પ્રમુખની ઓફિસ પર ત્રાટકેલા શખ્સોએ તોડફોડ કર્યાની અને તે શખ્સો પર થયેલા હુમલાની પોલીસમાં ફરિયાદ થયા પછી એક ફરિયાદમાં આરોપી તરીકે રહેલા ચાર આરોપીની અદાલતે જામીનમુક્તિ ફરમાવી છે.

જામનગર તાલુકાના મસીતિયા ગામના હાજી હમીર ખફી તથા જામનગર મુસ્લિમ બાવન જમાતના પ્રમુખ જુમાભાઈ ખફીના પુત્ર આરીફ વચ્ચે અગાઉ પૈસાની લેતીદેતી થઈ હતી. તે હિસાબ પૂર્ણ થઈ ગયો હોવા છતાં વધુ રકમની માંગણી કરી હાજી ખફી સાથે ઝઘડો કરાતો હતો. તે દરમિયાન થોડા દિવસ પહેલા હાજી ખફી તથા અન્ય વ્યક્તિઓએ ધોકા, તલવાર, પાઈપ સાથે આવી જુમાભાઈ ખફીની ઓફિસમાં તોડફોડ કરી મોટરમાં પણ નુકસાન કર્યું હતું.

તે પછી હાજી ખફી પર આરીફ ખફી, અસરફ ખફી, ફિરોઝ અને રફીક ખફીએ હુમલો કર્યાની હાજી ખફીએ પોલીસમાં ફરિયાદ નોંેંધાવી હતી. પોલીસે ગુન્હો નોંધી બંને પક્ષના આરોપીઓની ધરપકડ શરૃ કરી હતી. તે દરમિયાન આરોપી પૈકીના આરીફ, અસરફ, ફિરોઝ, રફીક ખફીએ જામીનમુક્ત થવા અદાલતમાં અરજી કરી હતી.

તેની સામે મૂળ ફરિયાદી હાજી ખફીએ લેખિતમાં વાંધાઓ રજૂ કરી જેમાં જણાવ્યું હતું કે, ફરિયાદીને ખૂબજ ગંભીર ઈજા થઈ છે, તેઓ હાલમાં આઈસીયુમાં છે. આ ફરિયાદમાં અન્ય કલમનો ઉમેરો પણ થઈ શકે તેમ છે ત્યારે આરોપીઓને જામીનમુક્ત કરવા ન જોઈએ તેની સામે આરોપીઓના વકીલે કરેલી દલીલો ગ્રાહ્ય રાખી અદાલતે આરોપી આરીફ, અસરફ, ફિરોઝ, રફીક ખફીને જામીન મુક્ત કરવાનો હુકમ કર્યાે છે. આરોપીઓ તરફથી વકીલ રાજેશ ગોસાઈ, વિશાલ જાની, હરદેવસિંહ આર. ગોહિલ, રજનીકાંત નાખવા, નિતેશ મુછડીયા રોકાયા છે.

જો આપને આ પોસ્ટ ગમી હોય તો શેર કરો...