Author: નોબત સમાચાર
ગુજરાતમાં સ્માર્ટ વીજમીટરો લગાવવા ફરજિયાતઃ ઊર્જા મંત્રી
વિધાનસભામાં સરકારે આપ્યો જવાબઃ
ગાંધીનગર તા. ર૧: ગુજરાતના વીજગ્રાહકોને ત્યાં ફરજિયાત સ્માર્ટ મીટર લગાવાશે. સરકારે વિધાનસભામાં આપી માહિતી આપતા કહ્યું હતું કે, હાલના મીટર અને સ્માર્ટ મીટરની કામગીરી સમાન છે.
ગુજરાતમાં સ્માર્ટ મીટરને લઈને હોબાળા થઈ રહ્યા છે. લોકોએ પ્રિ-પેઈડ રિચાર્જ સિસ્ટમને લઈને સ્માર્ટ મીટરનો વિરોધ કર્યો છે. આ દરમિયાન વિધાનસભામાં કિરીટ પટેલના પ્રિ-પેઈડ સ્માર્ટ મીટર અંગેના સવાલનો સરકારે જવાબ આપ્યો છે.
રાજ્યના ઊર્જા મંત્રી કનુ દેસાઈએ જણાવ્યું હતું કે, 'હાલના મીટર અને સ્માર્ટ મીટરની કામગીરી સમાન છે તો તમામ વિગતો મોબાઈલ પર ગ્રાહકો મેળવી શકશે.' 'પ્રિ-પેઈડ સ્માર્ટ મીટર લગાવવું ફરજિયાત છે. પ્રિ-પેઈડ સ્માર્ટ મીટરના અનેક પ્રકારના ફાયદા છે. પ્રિ-પેઈડ સ્માર્ટ મીટરના કારણે વીજ વપરાશની જાણકારી મોબાઈલ પર મળી રહેશે.
ઊર્જા વિભાગના જણાવ્યાનુસાર હાલના મેન્યુઅલ રીડિંગ પર આધાર રાખવાને બદલે સ્માર્ટ મીટર જાતે વીજ વપરાશનો ડેટા એકત્રિત કરે છે અને તેને વીજ વિતરણ કંપનીઓને ટ્રાન્સમીટ કરે છે. સ્માર્ટ મીટરમાં જે તે વીજ ગ્રાહકના વીજ વપરાશ અંગેના ડેટા તેમજ અન્ય માહિતી સ્માર્ટ મીટરની એપ્લિકેશન દ્વારા મોબાઈલ પર જ નિયમિત અને તાત્કાલિક ધોરણે વીજ ગ્રાહકને મળી રહે છે.
સ્માર્ટ મીટર ગ્રાહકલક્ષી મૈત્રીપૂર્ણ સુવિધાઓ ઉપલબ્ધ કરાવે છે. જેમાં એડવાન્સ મીટરીંગ સિસ્ટમ હોવાથી તે ગ્રાહકના સ્માર્ટ મીટર એપ્લિકેશન તેમજ ડિસ્ટ્રીબ્યુશન કંપની બન્ને સાથે કમ્યુનિકેટ કરે છે. સ્માર્ટ મીટરથી વીજ કંપની દરેક વિસ્તારની વીજ માંગ સમજી તેનું સરળતાપૂર્વક આયોજન કરી શકે છે.
અન્ય સમાચારો
