ખનીજચોરીના કેસમાં ભોગાત ગામના શખ્સને ત્રણ વર્ષની કેદઃ ૧૫ હજારનો દંડ

Author: નોબત સમાચાર

ખનીજચોરીના કેસમાં ભોગાત ગામના શખ્સને ત્રણ વર્ષની કેદઃ ૧૫ હજારનો દંડ

પાંચ વર્ષ પહેલાં ૧૪ ટન રેતી સાથે ઝડપાયો હતો ટ્રકઃ

જામનગર તા.૨૧ : ભાણવડ તાલુકાના ગુંદલા ગામ પાસેથી પાંચ વર્ષ પહેલાં રોયલ્ટી પાસ મેળવ્યા વગર ૧૪ ટન રેતી ડમ્પરમાં ભરીને જતાં શખ્સ સામે ખનીજચોરી અંગેનો ગુન્હો નોંધાયો હતો. તે કેસ ચાલી જતાં અદાલતે કલ્યાણપુરના ભોગાત ગામના આ શખ્સને ત્રણ વર્ષની કેદ અને ૧પ હજારનો દંડ ફટકાર્યાે છે.

દેવભૂમિ દ્વારકા જિલ્લાના ભાણવડ તાલુકામાં ગઈ તા.૮ માર્ચ ૨૦૨૦ની રાત્રે દ્વારકા જિલ્લાના ખાણખનીજ ખાતાની ટીમ પેટ્રોલિંગ કરતી હતી ત્યારે ગુંદલા ગામના પાટીયા પાસેથી પસાર થયેલા એક ડમ્પરને રોકી તેની તલાશી લેવાઈ હતી.

તે ડમ્પરમાંથી ૧૪ મે. ટન રેતી મળી આવી હતી. તે જથ્થા અંગે હેમત રામદે કરમુર નામના શખ્સને રોયલ્ટી પાસ દેખાડવા કહેવાતા આ ડ્રાઈવર પાસે તે પાસ ન હતો તેથી ડમ્પર સીઝ કરી લેવાયું હતું અને દરિયાઈ રેતી-ખનીજની ચોરી અંગે નોટીસ આપી આ શખ્સને રૂ.૧૨૧૩૮૦ ભરપાઈ કરવા સૂચના અપાઈ હતી. તેમ છતાં આ રકમ ભરવામાં ન આવતા ભાણવડ પોલીસ સ્ટેશનમાં ખનીજચોરીની ફરિયાદ કરાઈ હતી. તે કેસ ચાલવા પર આવતા અદાલતે ડીજીપી એલ.આર. ચાવડાની દલીલો ધ્યાને લઈ આરોપી હેમત રામદેભાઈ કરમુરને આઈપીસી ૩૭૯ હેઠળના ગુન્હામાં તકસીરવાન ઠરાવી ત્રણ વર્ષની સખત કેદની સજા અને રૂ.૧પ હજારનો દંડ ફટકાર્યાે છે.

જો આપને આ પોસ્ટ ગમી હોય તો શેર કરો...