મચ્છી માર્કેટ પાસેથી ઝડપાઈ દારૃની હેરફેરઃ આઠ બોટલ સાથે બેની ધરપકડ

Author: નોબત સમાચાર

મચ્છી માર્કેટ પાસેથી ઝડપાઈ દારૃની હેરફેરઃ આઠ બોટલ સાથે બેની ધરપકડ

એરફોર્સના કર્મચારી સહિત ત્રણ સામે નોંધાયો ગુન્હોઃ

જામનગર તા.૧ ઃ જામનગરની મચ્છી માર્કેટ પાસેથી ગઈકાલે પોલીસે બે શખ્સને શરાબની આઠ બોટલ સાથે પકડી પાડ્યા હતા. એરફોર્સનો કર્મચારી શરાબની બોટલ અન્ય પાસેથી મેળવી, પોતાનું કમીશન ચડાવી તેની ડિલિવરી આપવા આવ્યો હતો. પોલીસે તેની તથા બોટલ લેવા આવનાર શખ્સની ધરપકડ કરી છે અને સપ્લાયરની શોધ હાથ ધરી છે. રૃા.૬૪,૪૦૦નો મુદ્દામાલ કબજે કરાયો છે.

જામનગરની ધણશેરીની ખાડ પાછળ આવેલી મચ્છી માર્કેટ નજીક અંગ્રેજી શરાબની હેરાફેરી થતી હોવાની બાતમી પરથી ગઈકાલે સિટી-બી ડિવિઝનના સ્ટાફે વોચ ગોઠવી હતી. જેમાં કૌશલ પદમસિંગ શર્મા અને દેવેન ચંદ્રકાંત ગોકાણી નામના બે શખ્સ શરાબની આઠ બોટલ સાથે ઝડપાઈ ગયા હતા.

એરફોર્સ-૧માં રહેતા અને એરફોર્સમાં નોકરી કરતા કૌશલ કુમાર શર્મા નામનો શખ્સ ઉપરોક્ત બોટલ સ્વામી નારાયણનગરમાં આવેલા પૂજા એવન્યુમાં રહેતા દેવેન ગોકાણીને આ બોટલ આપવા આવ્યો હતો. ત્યારે જ પોલીસ પ્રગટી હતી. બંને શખ્સની અટકાયત કરી પૂછપરછ કરાતા કૌશલકુમાર તે બોટલ જામનગરના દિગ્વિજય પ્લોટની શેરી નં.૫૮માં રહેતા લાલુ નામના શખ્સ પાસેથી લાવ્યો હોવાનુું ખૂલ્યું છે.

તે બોટલ કૌશલે મેળવ્યા પછી તેમાં પોતાનું કમીશન ચડાવી કૌશલ તેની ડિલિવરી આપવા અને દેવેન ગોકાણી લેવા આવ્યો ત્યારે પોલીસે બંનેને પકડી પાડ્યા હતા. કુલ રૃા.૬૪૪૦૦નો મુદ્દામાલ કબજે કરી પોલીસે બંને શખ્સની ધરપકડ કરી છે અને લાલુની શોધ આરંભી છે.

જો આપને આ પોસ્ટ ગમી હોય તો શેર કરો...