પૂરપાર દોડતી કાર પીક-અપ ટેમ્પોમાં ઘુસી જતાં ૮ ના કરૂણ મૃત્યુ

Author: નોબત સમાચાર

પૂરપાર દોડતી કાર પીક-અપ ટેમ્પોમાં ઘુસી જતાં ૮ ના કરૂણ મૃત્યુ

બાળકો-મહિલાઓ સહિત પાંચ ઈજાગ્રસ્તો સારવાર હેઠળ

મુંબઈ તા. ૧૯: ગત મોડી રાતે પૂણેમાં ગમખ્વાર અકસ્માત સર્જાયો હતો. પૂરપાટ દોડતી કાર ઉભી પીકઅપમાં ઘુસી જતાં ૮ લોકોના દર્દનાક મૃત્યુ થયા હતા, જયારે પાંચ ઈજાગ્રસ્ત થયા હતાં.

મહારાષ્ટ્રના પૂણેમાં બુધવારે (૧૮ જૂન) મોડી રાત્રે અકસ્માત થયો હતો. અહીં જેજૂરી મોરગાંવ રોડ પર પૂરપાટ ગતિએ દોડતી સિડાન કાર અને પિકઅપ ટ્રક વચ્ચે જોરદાર ટક્કર થઈ હતી. આ અકસ્માતમાં ૮ લોકોના મોત નિપજ્યાં હતા અને પાંચ ઈજાગ્રસ્ત થયા છે. જેમાં બાળકો અને મહિલાઓ પણ સામેલ છે. પૂણે ગ્રામીણના એસપી સંદીપ સિંહ ગિલે આ વિશે જાણકારી આપતા જણાવ્યું કે, આ અકસ્માત જેજુરી-મોરગાંવ રોડ પર થયો હતો. પૂણેથી મોરગાંવ જઈ રહેલી કાર જેજુરીથી મોરગાંવ જઈ રહી હતી. આ દરમિયાન કારે શ્રીરામ ઢાબા સામે એક પિકઅપ ટેમ્પો સાથે ટક્કર મારી. કારમાં સવાર ચાર પુરૂષ અને એક મહિલા તેમજ પિકઅપ ચાલક અને ટ્રક પાસે ઊભેલા બે અન્ય લોકોના મોત નિપજ્યા હતા.

આ મામલે તપાસ ચાલી રહી છે. અકસ્માતની જાણ થતા જ પોલીસ તાત્કાલિક ઘટનાસ્થળે પહોંચી અને તપાસ શરૂ કરી હતી. ઘટનાસ્થળ પાસેથી મળતી માહિતી મુજબ, શ્રીરામ હોટેલની બહાર જ્યારે પિકઅપ ટેમ્પોમાંથી સામાન ઉતારવામાં આવી રહૃાો હતો, ત્યારે પાછળથી કારે જોરદાર ટક્કર મારી. અકસ્માત થતા જ ઘટનાસ્થળે ભીડ ભેગી થવા લાગી. પોલીસે પહોંચીને મૃતદેહો અને ઈજાગ્રસ્તોને હોસ્પિટલ મોકલ્યા હતા અને ક્રેન બોલાવીને, કાર અને પિકઅપને રસ્તામાંથી દૂર કરવામાં આવ્યા હતાં.

જો આપને આ પોસ્ટ ગમી હોય તો શેર કરો...