કાલાવડના નગરસેવક પર હુમલો કરનાર આરોપીની જામીન અરજી કોર્ટ દ્વારા ફગાવાઈ

Author: નોબત સમાચાર

કાલાવડના નગરસેવક પર હુમલો કરનાર આરોપીની જામીન અરજી કોર્ટ દ્વારા ફગાવાઈ

પ્રેમલગ્ન કરનાર શખ્સે હુલાવી હતી છરીઃ

જામનગર તા. ૧૯: કાલાવડ નગરપાલિકાના ભાજપના કોર્પોરેટર પર તેના બનેવીએ છરી વડે હિચકારો હુમલો કર્યાે હતો. પોલીસે આરોપીની ધરપકડ કરી જેલહવાલે કર્યાે હતો. આ આરોપીએ કરેલી જામીન અરજી અદાલતે નકારી કાઢી છે.

કાલાવડ શહેરમાં વસવાટ કરતા અને કાલાવડ ન.પા.માં કોર્પોરેટર તરીકે સેવા આપતા સદામભાઈ ગફારભાઈ બારાડીના બહેને અગાઉ જુનૈદ ઝીકર રાવ સાથે પ્રેમ નિકાહ કર્યા હતા. ત્યારથી બંને પરિવાર વચ્ચે વિખવાદ ઉભો થયો હતો. તે દરમિયાન આ યુવતીને જુનૈદ રાવે ઘરમાંથી કાઢી મુકતા આ યુવતીએ અરજી કરી હતી.

આ બાબતનો ખાર રાખી ગઈ તા.૧૮ મેના દિને સદામ ગફારભાઈ બારાડી પર બનેવી જુનૈદ રાવે છરી વડે હુમલો કરી જાનથી મારી નાખવાની ધમકી આપી હતી. જીવલેણ ઈજા પામેલા સદામ બારાડીને વધુ સારવાર માટે રાજકોટ દવાખાને ખસેડવામાં આવ્યા હતા. પોલીસે તેઓની ફરિયાદ પરથી જુનૈદ ઝીકર રાવની ધરપકડ કરી હતી.

આ આરોપીએ જામીનમુક્ત થવા અદાલતમાં અરજી કરતા મૂળ ફરિયાદીના વકીલે દલીલ કરી હતી કે, આરોપીને જામીન આપવામાં આવશે તો તે ફરીથી ફરિયાદી પર હુમલો કરી શકે છે અને સાક્ષી તથા પુરાવા સાથે પણ છેડછાડ કરશે તે દલીલ ગ્રાહ્ય રાખી અદાલતે આરોપી જુનૈદ ઝીકર રાવની જામીન અરજી નકારી કાઢી છે. મૂળ ફરિયાદી તરફથી વકીલ રાજેશ ગોસાઈ, વિશાલ જાની, એચ.આર. ગોહિલ, રજનીકાંત નાખવા, નિતેશ મુછડીયા, કરણ પટેલ રોકાયા છે.

જો આપને આ પોસ્ટ ગમી હોય તો શેર કરો...