દરેડ પાસે ઔદ્યોગિક વસાહતમાં ટ્રેક્ટર નજીકમાં રમતી બાળકી પર ફરી વળ્યું

Author: નોબત સમાચાર

દરેડ પાસે ઔદ્યોગિક વસાહતમાં ટ્રેક્ટર નજીકમાં રમતી બાળકી પર ફરી વળ્યું

માથું ચગદાઈ જવાથી ફૂલ જેવી બાળકીનું મૃત્યુઃ

જામનગર તા. ૪ઃ જામનગર નજીક દરેડ પાસે એક ઔદ્યોગિક વસાહતમાં ચાલતા બાંધકામના સ્થળ પર મંગળવારે સવારે પોણા બે વર્ષની બાળકી પર ટ્રેક્ટર ફરી વળતા આ બાળકીનું માથું ચગદાઈ જવાથી ઘટનાસ્થળે જ મૃત્યુ નિપજ્યું હતું. પોલીસે ટ્રેક્ટરચાલક સામે ગુન્હો નોંધ્યો છે.

જામનગર લાલપુર ધોરીમાર્ગ પર આવેલા દરેડ નજીકના યુનિટી ઈન્ડસ્ટ્રીયલ વિસ્તારમાં વસવાટ કરતા મૂળ મધ્યપ્રદેશના જાંબવા જિલ્લાના ઢેકલ ગામના વિનોદભાઈ વરસીંગ ગુંડીયા નામના શ્રમિક મંગળવારે સવારે ત્યાં ચાલતા બાંધકામના સ્થળે કામ કરી રહ્યા હતા.

આ સમયે નજીકમાં મીરા નામની પોણા બે વર્ષની બાળકી રમી રહી હતી. ત્યારે જીજે-૧૦-ડીઆર ૪૨૦૭ નંબરનું ટ્રેક્ટર પસાર થયું હતું. તેના ચાલકે બેફિકરાઈથી ડ્રાઈવીંગ કરી આ બાળકી પર ટ્રેક્ટર ચઢાવી દેતા તે બાળકીના માથા પરથી ટ્રેક્ટરનંુ મોટું ટાયર ફરી વળ્યું હતું અને ત્યાં હાજર લોકો દોડી આવ્યા હતા. કોઈએ ૧૦૮ને જાણ કરતા એમ્બ્યુલન્સ દોડી આવી હતી.

એમ્બ્યુલન્સના સ્ટાફે આ બાળકીને ચકાસ્યા પછી મૃત્યુ પામેલી જાહેર કરતા વિનોદભાઈ ગુંડીયાએ પંચકોશી બી ડિવિઝન પોલીસ સ્ટેશનમાં ટ્રેક્ટરના ચાલક સામે ફરિયાદ નોંધાવી છે. પોલીસે બીએનએસની કલમ ૧૦૬ (૧) હેઠળ ગુન્હો નોંધી ટ્રેક્ટર ચાલકની શોધ હાથ ધરી છે.

જો આપને આ પોસ્ટ ગમી હોય તો શેર કરો...