જામનગરમાં ચૂનાના ભઠ્ઠા પાસે યુવાન પર પિતા-પુત્ર દ્વારા લાકડીથી કરાયો હુમલોઃ બનાવનો વીડિયો વાયરલ

Author: નોબત સમાચાર

જામનગરમાં ચૂનાના ભઠ્ઠા પાસે યુવાન પર પિતા-પુત્ર દ્વારા લાકડીથી કરાયો હુમલોઃ બનાવનો વીડિયો વાયરલ

અગાઉના પોલીસ કેસનો ખાર રાખી બાવન જમાતના પ્રમુખ તથા પુત્રએ કર્યાે હુમલોઃ

જામનગર તા. ૪ઃ જામનગરના ચૂનાના ભઠ્ઠા વિસ્તારમાં ગયા રવિવારે બાઈક પર જતા એક યુવાનને સામેથી મોટરમાં આવતા પિતા-પુત્રએ રોકી લઈ અગાઉ કરેલી પોલીસ ફરિયાદનો ખાર રાખી લાકડીથી માર માર્યાે હતો. ત્યારપછી આ યુવાનની પત્નીને ગાળો ભાંડી જાનથી મારી નાખવાની ધમકી પણ અપાઈ હતી. આ બાબતનો વીડિયો સોશિયલ મીડિયામાં વાયરલ થયો છે. પોલીસે જામનગરની બાવન જમાતના પ્રમુખ અને તેના પુત્ર સામે ગુન્હો નોંધ્યો છે.

જામનગરના ચૂનાના ભઠ્ઠા વિસ્તારમાં ઢોલીયા પીરની દરગાહ પાસે રહેતા અહેમદરઝા મહંમદહુસેન નાઈ નામના યુવાન ગયા રવિવારે સવારે સાડા નવેક વાગ્યે પોતાના ઘર પાસે હતા ત્યારે સ્વીફટ મોટરમાં જુમા દોસ્તમામદ ખફી તથા તેનો પુત્ર આરીફ જુમા ખફી ધસી આવ્યા હતા.

દોઢેક વર્ષ પહેલાં અહેમદરઝાને કોઈ બાબતે આરીફ જુમા સહિતના વ્યક્તિઓએ માર માર્યાે હતો. જેની અહેમદરઝાએ પોલીસમાં ફરિયાદ નોંધાવી હતી. આ કેસ અદાલતમાં ચાલી રહ્યો છે. તેનો ખાર રાખી ઉપરોક્ત હુમલો કરાયો હતો.

પોતાના બાઈક પર અહેમદરઝા જતા હતા ત્યારે સામેથી મોટર લઈને આવેલા જુમાભાઈ અને આરીફ ખફીએ મોટર ઉભી રાખી સામુ કેમ જુએ છે તેમ કહી મોટરમાંથી ધોકો કાઢી હુમલો કર્યાે હતો. હાથમાં બે ફટકા મારી દેવાયા હતા. ત્યારપછી અહેમદરઝાના પત્ની પોતાના ઘર જતા હતા ત્યારે આરીફ જુમાએ તેણીને હવે તમે અહીંયા રહીને દેખાડજો તેમ કહી તારૃ પૂરૃ કરી નાખવું તેમ કહી જાનથી મારી નાખવાની ધમકી આપી હતી અને વીડિયો ઉતારવો હોય તો ઉતારી લે તેમ પણ કહ્યું હતું.

આ બાબતની સિટી એ ડિવિઝન પોલીસ સ્ટેશનમાં ગઈકાલે બપોરે અહેમદરઝા નાઈએ ફરિયાદ નોંધાવી છે. પોલીસે જુમાભાઈ તથા આરીફ જુમાભાઈ ખફી સામે બીએનએસની કલમો તેમજ જીપી એક્ટ હેઠળ ગુન્હો નોેધ્યો છે.

ઉલ્લેખનીય છે કે, ઉપરોકત બનાવનો જે તે વખતે બનાવવામાં આવેલો વીડિયો સોશિયલ મીડિયામાં વાયરલ થયો હતો. આરોપી જુમાભાઈ દોસમામદ ખફી જામનગરમાં બાવન જમાતમાં પ્રમુખ તરીકે સેવા આપી રહ્યા છે.

જો આપને આ પોસ્ટ ગમી હોય તો શેર કરો...