જામનગર જિલ્લાની એસઆઈઆરની ઉત્કૃષ્ટ કામગીરી નિહાળી રોલ ઓબ્ઝર્વરે તંત્રની પીઠ થાબડી

Author: નોબત સમાચાર

જામનગર જિલ્લાની એસઆઈઆરની ઉત્કૃષ્ટ કામગીરી નિહાળી રોલ ઓબ્ઝર્વરે તંત્રની પીઠ થાબડી

પ્રભારી સચિવ અને રોલ ઓબ્ઝર્વરના અધ્યક્ષસ્થાને સમીક્ષા બેઠક યોજાઈ

જામનગર તા.૧૮: રોલ ઓબ્ઝર્વર અને પ્રભારી સચિવ અનુપમ આનંદના અધ્યક્ષ સ્થાને જિલ્લામાં એસઆઈઆર અન્વયે થયેલ કામગીરીની સર્વગ્રાહી સમીક્ષા બેઠક યોજાઈ હતી. રોલ ઓબ્ઝર્વર અને પ્રભારી સચિવ દ્વારા જિલ્લાના તમામ મતદાર નોંધણી અધિકારીઓ દ્વારા હાથ ધરાયેલ કામગીરીની વિગતો જાણી જરૂરી સૂચનો કરાયાં હતાં. કામગીરીના નિરીક્ષણ પછી તેઓએ સંતોષ વ્યકત કરી તંત્રની પીઠ થાબડી હતી.

કલેક્ટર કચેરીમાં જિલ્લા ચૂંટણી અધિકારી કેતન ઠક્કરની ઉપસ્થિતિમાં જામનગર કલેકટર કચેરીમાં તમામ ઈઆરઓ, એઈઆરઓ તેમજ એડ. એઈઆરઓ સાથે રોલ ઑબ્ઝર્વર અને પ્રભારી સચિવ અનુપમ આનંદે એસઆઈઆર અંતર્ગત જિલ્લામાં થયેલી કામગીરીની સર્વગ્રાહી સમીક્ષા કરી હતી.

રોલ ઓબ્ઝર્વેરએ સમીક્ષા બેઠક દરમિયાન ચૂંટણીલક્ષી કામગીરીને વધુ સુદૃઢ બનાવવા માટે મહત્ત્વપૂર્ણ માર્ગદર્શન આપ્યું હતું. તેમણે સંબંધિત અધિકારીઓને ભારપૂર્વક જણાવ્યું હતું કે મેપિંગની કામગીરી વધુમાં વધુ થાય તેવું આયોજન કરવું, બૂથ લેવલ ઓફિસર્સ બીએલઓને એસઆઈઆર અંતર્ગત આગામી સમયમાં કરવાની થતી કામગીરી બાબતે તાલીમ આપવી અને તમામ કામગીરી ચોકસાઈપૂર્વક અને નિયત સમય મર્યાદામાં પૂર્ણ થાય તે રીતે સુચારુ આયોજન કરવા માટે સૂચના આપવામાં આવી. નવા મતદારોના ફોર્મ નંબર ૬ સત્વરે મેળવે અને તે સંદર્ભે વિશેષ કેમ્પ કરવા પણ સૂચના આપવામાં આવી.

આ ઉપરાંત તેમણે સમયાંતરે રાજકીય પક્ષોના પ્રતિનિધિઓ સાથે બેઠક યોજીને સહકાર સાધવા પણ જણાવ્યું હતું. તેમણે સ્પષ્ટપણે નિર્દેશ આપ્યો હતો કે જિલ્લાનું ચૂંટણી તંત્ર એ દિશામાં કામગીરી હાથ ધરે કે જેના પરિણામે મતદારયાદી ખરા અર્થમાં ચોકસાઈભરી અને ભૂલરહિત બને.

જામનગર જિલ્લામાં એસઆઈઆર અંતર્ગત થયેલી ઉત્કૃષ્ટ કામગીરીનું નિરીક્ષણ કરીને રોલ ઓબ્ઝર્વર અને પ્રભારી સચિવે થયેલ કામગીરી પ્રત્યે સંતોષ વ્યક્ત કર્યો હતો અને થયેલ કામગીરી બદલ જિલ્લા ચૂંટણી તંત્રને અભિનંદન પાઠવ્યા હતા.

જો આપને આ પોસ્ટ ગમી હોય તો શેર કરો...