જોડિયાના ભીમકટા ગામમાં તાલુકાકક્ષાના સ્વાતંત્ર્ય પર્વની ઉજવણીઃ વિવિધ કાર્યક્રમો

Author: નોબત સમાચાર

જોડિયાના ભીમકટા ગામમાં તાલુકાકક્ષાના સ્વાતંત્ર્ય પર્વની ઉજવણીઃ વિવિધ કાર્યક્રમો

ધ્રોલ-જોડિયાના પ્રાંત અધિકારીના હસ્તે ધ્વજવંદનઃ

હડિયાણા તા.૧૮ ઃ જોડિયા તાલુકાકક્ષાનો ૭૭મો સ્વાતંત્ર્ય પર્વ ભીમકટા ગામમાં યોજવામાં આવ્યો હતો. ધ્રોલ, જોડિયાના પ્રાંત અધિકારી વી.ડી. સાકરીયાના હસ્તે ધ્વજ વંદન કરવામાં આવ્યું હતું અને રાષ્ટ્રગીત ગાવામાં આવ્યું હતું. ત્યારપછી પ્રાંત અધિકારી દ્વારા પ્રાસંગિક ઉદ્બોધન કરાયું હતું.

આ તકે જોડિયા તાલુકા વિકાસ અધિકારી માધુરીબેન પટેલ, જોડિયા મામલતદાર ઈન્ચાર્જ ગોહિલ, કચેરીના તમામ અધિકારીઓ ઉપસ્થિત રહ્યા હતા. જામનગર જિ.પં.ના ચંદ્રિકાબેન અઘેરા, જોડિયા તાલુકા પંચાયતના પ્રમુખ નાથાલાલ સાવરીયા, જોડિયા તાલુકા પંચાયતના ઉપપ્રમુખ ઘનશ્યામભાઈ રાઠોડ, જોડિયા તાલુકા ભાજપ પ્રમુખ ભરતભાઈ દલસાણીયા, જોડિયા-મેઘપર ગામના ભાજપ મહામંત્રી કિશોરભાઈ મઢવી, રાજવીર રાઠોડ, જેઠાલાલ અઘેરા, અન્ય આગેવાનો, ગ્રામ પંચાયતના સરપંચ, ઉપસરપંચ સદસ્યો અને સમગ્ર ગ્રામજનોમાં ઉપસ્થિત રહીને આ કાર્યક્રમમાં ઉત્સાહપૂર્વક ભાગ લીધો હતો.

ભીમકટા પ્રા.શાળાના બાળકોએ સાંસ્કૃતિક કાર્યક્રમમાં ભાગ લીધો હતો. તાલુકાકક્ષા, જિલ્લાકક્ષા અને રાજ્યકક્ષાએ સિદ્ધિ મેળવેલી, વિદ્યાર્થીઓને પ્રમાણપત્ર આપી પ્રોત્સાહિત કરાયા હતા. જોડિયા તાલુકાના પ્રતિભાશાળી શિક્ષકોને પ્રમાણ પત્ર આપી સન્માનિત કરવામાં આવ્યા હતા.

આ તકે ભીમકટા ગામના માજી સરપંચ જાડેજા બળવંતસિંહ જીલુભા દ્વારા ગામના ઈતિહાસ અને ભીમકટા ગામની માહિતી તેમજ પધારેલા સમગ્ર દેશપ્રેમી જનતાનું શાબ્દિક સ્વાગત કરવામાં આવ્યું હતું. સમગ્ર કાર્યક્રમમાં સ્કૂલના બાળકો અને ગ્રામજનોએ ભારે ઉત્સાહપૂર્વક પર્વની ઉજવણી કરી હતી. કાર્યક્રમના અંતે પ્રાંત અધિકારી, તાલુકા વિકાસ અધિકારી જોડિયા તેમજ અન્ય આગેવાનો દ્વારા 'મેરી મિટ્ટી મેરા દેશ' અંતર્ગત શાળાના પટાંગણમાં વૃક્ષારોપણ કરવામાં આવ્યું હતંુ. શાળાના બાળકો તેમજ ઉપસ્થિતોને નાસ્તો કરાવવામાં આવ્યો હતો.

જો આપને આ પોસ્ટ ગમી હોય તો શેર કરો...