રિલાયન્સ ઈન્ડ. દ્વારા ૧૧,૦૦૦ બાળકોને ગણવેશ

Author: નોબત સમાચાર

રિલાયન્સ ઈન્ડ. દ્વારા ૧૧,૦૦૦ બાળકોને ગણવેશ

જામનગર જિલ્લાની પ૭ સરકારી પ્રાથમિક શાળાઓમાં

જામનગર તા. ૧૮ઃ રિલાયન્સ ઈન્ડસ્ટ્રીઝ લિમિટેડ દ્વારા ગ્રુપ પ્રેસિડેન્ટ શ્રી ધનરાજભાઈ નથવાણીના માર્ગદર્શનમાં લાલપુર તાલુકાની ૩૩ પ્રાથમિક શાળાઓ અને જામનગર તાલુકાની ર૪ પ્રાથમિક શાળાઓ મળીને જામનગર જિલ્લાની કુલ પ૭ સરકારી પ્રાથમિક શાળાઓમાં ૧૧,૦૦૦ થી વધુ વિદ્યાર્થીઓને શાળા ગણવેશ પૂરા પાડવામાં આવ્યા છે. નોંધપાત્ર બાબત એ છે કે, પ્રથમ વખત આ પહેલમાં આજુબાજુના ગામડાની મહિલાઓના સ્વ-સહાય જુથો પાસે કેટલાક ગણવેશ તૈયાર કરાવીને તેમના સિલાઈ કૌશલ્ય, વ્યાવસાયિક્તા અને આત્મવિશ્વાસ વધે તેવી તક પણ પૂરી પાડવામાં આવી છે.

જામનગરના જિલ્લા વિકાસ અધિકારી શ્રી વિકલ્પ ભારદ્વાજ દ્વારા તાજેતરમાં નાની ખાવડી પ્રાથમિક શાળામાં પ્રતીકરૃપે ગણવેશનું વિતરણ કરીને આ પહેલનો પ્રારંભ કરાવવામાં આવ્યો હતો. રિલાયન્સ ઈન્ડસ્ટ્રીઝ સમર્થિત 'સ્વાશ્રય' મહિલા જુથ સહિત લગભગ ૧પ જેટલા સખી મંડળોએ ૧પ૦૦ જેટલા ગણવેશ તૈયાર કર્યા હતાં. જિલ્લા વિકાસ અધિકારીએ આ પ્રસંગે આ સખીમંડળોને પણ પરોત્સાહિત કર્યા હતાં.

ઉલ્લેખનિય છે કે, શાળાઓમાં નાની ઉંમરે વિદ્યાર્થીઓમાં સમાનતા અને ટ્રસ્ટીશીપના મૂલ્યો કેળવવામાં આવે તો સમાજમાં પ્રવર્તતા સામાજિક-આર્થિક અંતરને દૂર કરવામાં મદદ કરી શકે છે. બાળકોમાં સમાનતાના આ મૂલ્યો સાકાર કરવા માટે રિલાયન્સ દ્વારા શૈક્ષણિક વ્યવસ્થામાં અવિરત સહાયના વિવિધ અભિયાન ચલાવાઈ રહ્યા છે.

જિલ્લા વિકાસ અધિકારી વિકલ્પ ભારદ્વાજે નાની ખાવડીમાં સતીમાતા મંદિર પાસેના અમૃત સરોવરની પણ મુલાકાત લીધી હતી અને સુંદર વાતાવરણની જાળવણી માટે ગ્રામજનોની પ્રશંસા કરી હતી. આ પ્રસંગે નાની ખાવડી પ્રાથમિક શાળાના વિદ્યાર્થીઓ અને સ્ટાફ, ગામના પ્રતિનિધિઓ, શાળા વ્યવસ્થાપન સમિતિના સભ્યો, વાલીઓ અને ગ્રામજનો ઉપસ્થિત રહ્યા હતાં.

જો આપને આ પોસ્ટ ગમી હોય તો શેર કરો...