આવતીકાલથી બજેટ સત્રનો પ્રથમ તબકકોઃ શનિવારે બજેટ

Author: નોબત સમાચાર

આવતીકાલથી બજેટ સત્રનો પ્રથમ તબકકોઃ શનિવારે બજેટ

રાષ્ટ્રપતિ દ્રૌપદી મુર્મુ બન્ને ગૃહોના સંયુકત સત્રને કરશે સંબોધન

નવી દિલ્હી તા. ૩૦: આવતીકાલથી બજેટ સત્ર શરૂ થઈ રહ્યું છે, અને રાષ્ટ્રપતિનું સંબોધન પછી શનિવારે બજેટ રજૂ થશે. રાષ્ટ્રપતિ દ્રૌપદી મુર્મુ સંસદના સંયુકત સત્રને સંબોધિત કરશે. સત્રનો બીજો તબકકો ૧૦ માર્ચથી શરૂ થશે. સત્રમાં કુલ ૨૭ બેઠકનો પ્રસ્તાવ છે.

સંસદનું બજેટ સત્ર આવતીકાલ ૩૧ જાન્યુઆરીથી શરૂ થશે અને ૪ એપ્રિલ સુધી ચાલુ રાખવાનો પ્રસ્તાવ છે. નાણામંત્રી નિર્મલા સીતારમણ ૧ ફેબ્રુઆરીના રોજ સામાન્ય બજેટ રજૂ કરશે. સંસદીય બાબતોના મંત્રી કિરેન રિજિજુએ 'એકસ' પરની એક પોસ્ટમાં આ માહિતી આપી હતી. તેમણે કહૃાું, ભારત સરકારની ભલામણ પર રાષ્ટ્રપતિ દ્રૌપદી મુર્મુએ ૩૧ જાન્યુઆરી, ૨૦૨૫ થી ૪ એપ્રિલ, ૨૦૨૫ દરમિયાન બજેટ સત્ર, ૨૦૨૫ માટે સંસદના બંને ગૃહો બોલાવવા માટે મંજૂરી આપી છે.

પરંપરા મુજબ, સત્ર ૩૧ જાન્યુઆરીએ સંસદના બંને ગૃહની સંયુક્ત બેઠક સાથે શરૂ થશે, જેને રાષ્ટ્રપતિ દ્રૌપદી મુર્મુ સંબોધિત કરશે. આ પછી આર્થિક સર્વે રજૂ કરવામાં આવશે. આ પછી, ૧ ફેબ્રુઆરીએ, નિર્મલા સીતારમણ વડા પ્રધાન નરેન્દ્ર મોદીના ત્રીજા કાર્યકાળનું પ્રથમ પૂર્ણ બજેટ અને નાણામંત્રી તરીકે સતત આઠમું બજેટ રજૂ કરશે.

કેન્દ્રીય બજેટ ૨૦૨૫-૨૬ ૧-ફેબ્રુઆરી ૨૦૨૫ ના રોજ લોકસભામાં રજૂ કરવામાં આવશે. ૧૩ ફેબ્રુઆરીના બંને ગૃહોની કાર્યવાહી લાંબા સમય સુધી સ્થગિત રહેશે. સંસદની કાર્યવાહી ૧૦ માર્ચે ફરી શરૂ થશે જેમાં વિવિધ મંત્રાલયો/વિભાગોની ગ્રાન્ટ માંગણીઓ પર ચર્ચા કરવામાં આવશે અને બજેટ પસાર કરવામાં આવશે. સત્રનો બીજો તબક્કો ૧૦ માર્ચથી શરૂ થશે અને ૪ એપ્રિલ સુધી ચાલુ રહેવાની શકયતા છે.

બજેટ સત્રમાં કુલ ૨૭ બેઠકોનો પ્રસ્તાવ છે. રિજિજુએ જણાવ્યું હતું કે બંને ગૃહો ૧૩ ફેબ્રુઆરીએ વિરામ માટે મુલતવી રાખી શકે છે અને ૧૦ માર્ચે વિવિધ મંત્રાલયો અને વિભાગોની ગ્રાન્ટની માંગણીઓ પર ચર્ચા કરવા માટે ફરી મળી શકે છે.

ઉલ્લેખનિય છે કે, સત્રના પ્રથમ તબક્કામાં બંને ગૃહોમાં રાષ્ટ્રપતિના અભિભાષણ પર આભાર પ્રસ્તાવ પર ચર્ચા થાય છે અને સંસદના બંને ગૃહમાં વડાપ્રધાનના જવાબ સાથે સમાપ્ત થાય છે.

જો આપને આ પોસ્ટ ગમી હોય તો શેર કરો...