જામનગરમાંથી ઝડપાયા પાંચ બાંગ્લાદેશીઃ પૂછપરછ શરૂ કરાઈ

Author: નોબત સમાચાર

જામનગરમાંથી ઝડપાયા પાંચ બાંગ્લાદેશીઃ પૂછપરછ શરૂ કરાઈ

ત્રણ મહિલા અને બે પુરૂષ ગેરકાયદે વસવાટ કરતા હોવાનો પ્રાથમિક તબક્કે ઘટસ્ફોટઃ તપાસનો ધમધમાટ શરૃઃ

જામનગર તા. ૨: જામનગરની પટેલ કોલોનીના છેવાડાના વિસ્તારમાં એક મકાનમાં આજે એસઓજી ટીમે પૂર્વ બાતમીના આધારે દરોડો પાડી ત્રણ મહિલા તથા બે પુરૂષને પકડી પાડ્યા છે. આ પાંચેય વ્યક્તિ બાંગ્લાદેશના વતની હોવાની આશંકા સેવાઈ રહી છે. તમામ વ્યક્તિઓની અટકાયત કરી પૂછપરછ માટે એસપી સમક્ષ રજૂ કરવામાં આવ્યા છે. વધુ વિગતો મેળવાઈ રહી છે.

જામનગરના શહેરના પટેલ કોલોની વિસ્તારમાં એક શેરીમાં કેટલાક શખ્સો અને મહિલાઓ શંકાસ્પદ રીતે હિલચાલ કરતા હોવાની અને આ વ્યક્તિઓ ભારતીય નાગરિક ન હોવાની ચોંકાવનારી વિગત જામનગરના સ્પેશિયલ ઓપરેશન ગ્રુપને મળતા એસપી ડો. રવિમોહન સૈનીને વાકેફ કરાયા પછી સિટી ડીવાયએસપી જે.એન. ઝાલાના વડપણ અને પીઆઈ બી.એન. ચૌધરીની સૂચનાથી એસઓજી ટીમ તપાસમાં લાગી હતી.

તે દરમિયાન પટેલ કોલોનીના છેવાડાના વિસ્તારમાંથી એક ભાડાના મકાનમાં રહેતા ત્રણ મહિલા અને બે પુરૂષ મળી આવ્યા હતા. આ વ્યક્તિઓની પૂછપરછ કરવામાં આવતા આ વ્યક્તિઓ લાંબા સમયથી ત્યાં ભાડાના મકાનમાં રહેતા હોવાનું અને આ વ્યક્તિઓ બાંગ્લાદેશના વતની હોવાનું ખૂલ્યું છે.

ત્રણ મહિલા અને બે પુરૂષને અટકાયતમાં લઈ એસઓજી ટીમે તેઓની પૂછપરછ આરંભી છે જેમાં પ્રાથમિક તબક્કે ખૂલ્યા મુજબ બે પુરૂષ અને બે મહિલા લાંબા સમયથી ત્યાં મકાન ભાડે રાખીને વસવાટ કરતા અને એક મહિલા તાજેતરમાં ત્યાં રહેવા આવી હતી. આ વ્યક્તિઓ પૈકીના કેટલાક વ્યક્તિ પાસે પશ્ચિમ બંગાળના કેટલાક આધારકાર્ડ હોવાનંુ પણ જાણવા મળી રહ્યંુ છે. પાચેયને આજે જિલ્લા પોલીસવડા કચેરીમાં લઈ આવવામાં આવ્યા હતા. જ્યાં એસપી ડો. સૈનીએ આ વ્યક્તિઓની ઘનિષ્ઠ પૂછપરછ શરૂ કરી છે.

આ પાંચેય બાંગ્લાદેશી વ્યક્તિઓ શા માટે જામનગર આવ્યા? તેમજ કોના તરફથી આશરો મળ્યો? વગેરે પ્રશ્નોના ઉત્તર મેળવવા પૂછપરછ કરાઈ રહી છે અને અન્ય સુરક્ષા એજન્સીઓને પણ તેની જાણ કરવામાં આવી છે.

જો આપને આ પોસ્ટ ગમી હોય તો શેર કરો...