પોલીસને જુગારની બાતમી આપ્યાની શંકાથી દંપતી પર પાંચ શખ્સનો હલ્લો

Author: નોબત સમાચાર

પોલીસને જુગારની બાતમી આપ્યાની શંકાથી દંપતી પર પાંચ શખ્સનો હલ્લો

ખીમાણી સણોસરામાં પ્રૌઢને માર પડ્યોઃ

જામનગર તા. ૩૧ઃ જામનગરના રણજીતસાગર રોડ પર હર્ષદ મીલની ચાલી પાસે શનિવારે એક યુવાન તથા તેના પત્ની પર પાંચ શખ્સે પોલીસને જુગારની બાતમી આપવાની શંકાથી હુમલો કરી બે મોબાઈલ, ઈયર ફોન, ચાંદીની માળા તોડી નાખ્યા હતા. ત્યારે ખીમાણી સણોસરાના યુવાન પર ચાર શખ્સે હલ્લો કર્યાે હતો.

જામનગરના રણજીત સાગર રોડ પર હર્ષદ મીલની ચાલી પાસે બાઈની વાડીમાં રહેતા ગોપાલભાઈ કિશનભાઈ પરમાર નામના યુવાનને શનિવારની રાત્રે તેમના ઘર પાસે ગૌતમ દિનેશભાઈ પરમાર, યુવરાજ પ્રકાશભાઈ, રાજ કિશોરભાઈ, વિમલ દીપકભાઈ, જયરાજ પ્રકાશભાઈ પરમાર નામના પાંચ શખ્સે રોકી લીધા હતા.

અમારી જુગારની બાતમી પોલીસમાં આપીને અમને પકડાવ્યા હતા તેમ કહી ગૌતમે ઢીકાપાટુ અને પથ્થરથી હુમલો કર્યાે હતો. જ્યારે બાકીના શખ્સોએ ધોકો, પાઈપ, મુઠથી હલ્લો કર્યાે હતો. આ વેળાએ ગોપાલભાઈના પત્ની મંજુબેન આવી જતાં તેઓને જયરાજે ફડાકા ઝીંકી બે મોબાઈલ તોડી નાખ્યા હતા અને ચાંદીની માળા પણ તોડી નાખી હતી. તે પછી હુમલાખોરો નાસી ગયા હતા. ગોપાલભાઈએ સિટી-એ ડિવિઝન પોલીસ સ્ટેશનમાં ફરિયાદ નોંધાવી છે.

કાલાવડ તાલુકાના ખીમાણી સણોસરા ગામમાં રહેતા સહદેવસિંહ પ્રવીણસિંહ જાડેજા ગઈકાલે બપોરે રાજકોટથી બાઈકમાં પોતાના ગામ આવતા હતા ત્યારે ચાપરા ગામની સીમમાં અનિરૃદ્ધસિંહ ધીરૃભા જાડેજાએ રસ્તો બંધ કરતા તેને સહદેવસિંહે રસ્તો કેમ બંધ કર્યાે છે તેમ પૂછતા અહીંથી નીકળવાની અગાઉ પણ ના પાડી છે તેમ કહી અનિરૃદ્ધસિંહ તેમજ રવિરાજ, યોગીરાજસિંહ, દિવ્યરાજસિંહ શિવરાજસિંહ જાડેજાએ ગાળો ભાંડી ધોકા વડે હુમલો કર્યાે હતો અને જાનથી મારી નાખવાની ધમકી આપી હતી. કાલાવડ ગ્રામ્ય પોલીસ સ્ટેશનમાં ફરિયાદ કરાઈ છે.

જો આપને આ પોસ્ટ ગમી હોય તો શેર કરો...