રોકાણ સામે પાંચ વર્ષમાં બમણી રકમ મળવાની લાલચમાં નગરના વૃદ્ધા સાથે રૂ.૧૫ લાખની છેતરપિંડી કરાયાની રાવ

Author: નોબત સમાચાર

રોકાણ સામે પાંચ વર્ષમાં બમણી રકમ મળવાની લાલચમાં નગરના વૃદ્ધા સાથે રૂ.૧૫ લાખની છેતરપિંડી કરાયાની રાવ

પાંચ વર્ષની મુદ્દત પૂર્ણ થઈ ગઈ તેને પણ ત્રણ વર્ષ વીતી ગયા!:

જામનગર તા. ૫: જામનગરના ખોજાનાકા વિસ્તારમાં વાંઢાના ડેલા પાસે વસવાટ કરતા એક વૃદ્ધાએ સાતેક વર્ષ પહેલા ગુજરાત લેન્ડ ડેવલોપર્સ ગ્રુપના ડાયરેક્ટર તરીકે ઓળખ આપતા વ્યક્તિ સાથે પરિચય થયા પછી તેની વાતોમાં આવી પાંચ વર્ષમાં પોતાની બચત બમણી થઈ જશે તેમ માની રૂ.૧૫ લાખ ૧૫ હજાર રોક્યા પછી ત્રણ વર્ષ પહેલાં તેની મુદ્દત પૂર્ણ થઈ ગઈ હોવા છતાં આ વૃદ્ધાને તેઓની રકમ ન મળતા કરેલી ઉઘરાણી સામે જાનથી મારી નાખવાની ધમકી અપાતા તેઓએ છેતરપિંડી કરવા અંગે ડાયરેક્ટર તરીકે ઓળખાણ આપનાર જામનગરના શખ્સ સામે પોલીસમાં ફરિયાદ નોંધાવી છે.

જામનગરના ખોજાનાકા વિસ્તારમાં આવેલા સિંધી જમાતખાનાવાળી શેરીમાં વાંઢાના ડેલામાં રહેતા બાનુબેન મહંમદભાઈ શેખ (ઉ.વ.૬પ) નામના વૃદ્ધાએ ગઈકાલે સિટી એ ડિવિઝન પોલીસ સ્ટેશનમાં ફરિયાદ નોંધાવી છે. જેમાં તેઓએ કાલાવડ નાકા બહાર આવેલી સિલ્વર સોસાયટી પાસે ટીટોડી વાડીમાં મન્નત નામના મકાનમાં રહેતા ઈરફાન કાસમ શેખ સામે રાવ કરી છે.

ફરિયાદમાં જણાવવામાં આવ્યા મુજબ વર્ષ ૨૦૧૭માં ગુજરાત લેન્ડ ડેવલોપર્સ ગ્રુપ નામની એક કંપનીના ડાયરેક્ટર હોવાની ઓળખાણ આપી ઈરફાન કાસમ શેખનો પરિચય થયો હતો. આ શખ્સે અમારી કંપનીમાં પૈસા રોકો તો પાંચ વર્ષમાં તે રકમ બમણી થઈ જવાની વાત કરતા બાનુબેને જે તે વખતે રૂ.૧પ લાખ ૧પ હજાર કટકે કટકે રોકાણ કરવા માટે ઈરફાન શેખને આપ્યા હતા.

ઉપરોક્ત મુદ્દત વર્ષ ૨૦૨૨માં પૂર્ણ થઈ ગઈ હતી. તેથી બાનુબેને પોતાની રકમ પરત માંગી હતી. મુદ્દત પૂર્ણ થઈ ગયાના ત્રણ વર્ષ વિત્યા હોવા છતાં આ વૃદ્ધાને તેમની રકમ આપવામાં આવતી ન હતી તેથી વારંવાર ઉઘરાણી કરતા બાનુબેનને ગયા જુન મહિનાની પહેલી તારીખે ઈરફાન શેખે જાનથી મારી નાખવાની ધમકી આપી હતી. જેની ગઈકાલે બાનુબેને પોલીસમાં ફરિયાદ કરી છે. પોલીસે છેતરપિંડી કરવા અંગે ઈરફાન કાસમ શેખ સામે બીએનએસની કલમ ૩૧૮ (ર), ૩૫૨ (૩) હેઠળ ગુન્હો નોંધી તપાસ શરૂ કરી છે.

જો આપને આ પોસ્ટ ગમી હોય તો શેર કરો...