નગરની બે સગીરાને ગેસ્ટ હાઉસમાં લઈ જઈ દુષ્કર્મ ગુજારનાર બે શખ્સને ૨૦-૨૦ વર્ષની કેદ

Author: નોબત સમાચાર

નગરની બે સગીરાને ગેસ્ટ હાઉસમાં લઈ જઈ દુષ્કર્મ ગુજારનાર બે શખ્સને ૨૦-૨૦ વર્ષની કેદ

ગેસ્ટ હાઉસના મેનેજરને રૂ.૧૦ હજારનો દંડઃ

જામનગર તા. ૨૧: જામનગરની એક સંસ્થામાંથી ચાર વર્ષ પહેલાં રાત્રીના સમયે નીકળી ગયેલી બે સગીરાને સાતરસ્તા પાસેથી રિક્ષામાં બેસાડી એક રિક્ષાચાલકે બંને પર દુષ્કર્મ ગુજાર્યું હતું અને તેનો લાભ લઈ રિક્ષાચાલકના મિત્રએ પણ દુષ્કૃત્ય આચર્યું હતું. આ બંને આરોપીને અદાલતે ૨૦-૨૦ વર્ષની કેદ અને ગેસ્ટ હાઉસમાં રૂમ આપનાર મેનેજરને રૂ.૧૦ હજારનો દંડ ફટકાર્યાે છે.

જામનગરની એક સંસ્થામાં આશ્રય મેળવીને રહેતી એક સાડા તેર વર્ષની અને એક સવા પંદર વર્ષની તરૂણી ગઈ તા.૨-૪-૨૦૨૧ની રાત્રિના ત્રણેક વાગ્યે તે સંસ્થામાંથી નીકળી ગઈ હતી. આ તરૂણીઓને તે સંસ્થામાં રહેવાનું ગમતું ન હોવાથી ત્યાંથી બહાર નીકળી ગઈ હતી અને રાત્રિના સમયે જ સાત રસ્તા સર્કલ નજીક આવી પહોંચી હતી.

ત્યાં આવેલા એક પાર્લર પાસે રિક્ષા રાખીને ઉભેલા નવાબ બશીર સેતા નામના શખ્સે ક્યા જવું છે તેમ પૂછતા આ તરૂણીઓએ ફરવા જવું છે તેમ કહેતા નવાબના દિમાગમાં શૈતાની વિચાર ઉદ્ભવ્યો હતો અને તેણે આ તરૂણીઓને રિક્ષામાં બેસાડી લઈ શહેરમાં આંટા મરાવ્યા પછી ખોડિયાર કોલોની નજીક રાજ ચેમ્બર ગેસ્ટ હાઉસમાં લઈ જઈ વારાફરતી બંને તરૂણી પર દુષ્કર્મ ગુજાર્યું હતું.

ત્યારપછી બીજા દિવસની સવારે નવાબનો મિત્ર રાહુલ ભરતભાઈ સોલંકી ગેસ્ટ હાઉસ પર આવ્યો હતો. જયાં તેણે પણ દુષ્કર્મ ગુજાર્યું હતું. આ બાબતની પોલીસમાં ફરિયાદ થયા પછી પોલીસે નવાબ સેતા, રાહુલ સોલંકી અને ગેસ્ટ હાઉસનો ઓરડો આપનાર મેનેજર સક્સેશ સુરાભાઈ અસ્વાર સામે ગુન્હો નોંધ્યો હતો.

ઉપરોક્ત કેસ જામનગરની ખાસ પોક્સો અદાલતમાં ચાલવા પર આવતા સરકાર પક્ષે ૧૮ સાહેદોને તપાસ્યા હતા. ભોગ બનનાર સગીરાઓએ પણ જુબાની આપી હતી. તે તમામ દલીલો ગ્રાહ્ય રાખ્યા પછી અદાલતે આરોપી નવાબ બશીર સેતા અને રાહુલ ભરત સોલંકીને તક્સીરવાન ઠરાવી આઈપીસી તથા પોક્સો એક્ટની કલમો હેઠળ ૨૦-૨૦ વર્ષની સખત કેદની સજા અને રૂ.૧૦-૧૦ હજારનો દંડ ફટકાર્યાે છે. ભોગ બનનાર સગીરઓને કમ્પેઈન્સેશનમાંથી રૂ.૨ લાખનું વળતર ચૂકવવામાં આવશે. સરકાર તરફથી વકીલ ભારતીબેન વાદી રોકાયા હતા. ગેસ્ટ હાઉસમાં રૂમ આપનાર મેનેજરને રૂ.૧૦ હજારનો દંડ ફટકારાયો છે.

જો આપને આ પોસ્ટ ગમી હોય તો શેર કરો...