સેનાનગરમાં એક શખ્સના મકાનમાંથી મળી દારૂની ૧૭૦ બોટલઃ આરોપી ફરાર

Author: નોબત સમાચાર

સેનાનગરમાં એક શખ્સના મકાનમાંથી મળી દારૂની ૧૭૦ બોટલઃ આરોપી ફરાર

ભેંસદળમાં વાડામાંથી મળી આવી ઈંગ્લીશ દારૂની બાવન બોટલઃ સપલાયરનું નામ ખૂલ્યું:

જામનગર તા. ૧૩: જામનગરના ઢીંચડા રોડ પર આવેલા સેનાનગરમાં એક શખ્સના મકાનમાં ગઈકાલે એલસીબીએ દરોડો પાડી દારૂની ૧૭૦ બોટલ કબજે કરી છે. ધ્રોલના ભેંસદળ ગામમાં દારૂનું વેચાણ કરતા એક શખ્સને પોલીસે બાવન બોટલ સાથે ઝડપી લીધો છે. પીયાવા ચોકડી પાસેથી એક શખ્સ બોટલ સાથે મળી આવ્યો છે.

જામનગરની ગુન્હાશોધક શાખાના સ્ટાફ દ્વારા ગઈકાલે કરવામાં આવી રહેલા પેટ્રોલિંગમાં સ્ટાફના કિશોર પરમાર, વનરાજ મકવાણા, ધાનાભાઈ મોરીને બાતમી મળી હતી કે, ઢીંચડા રોડ પર સેના નગરમાં રહેતા એક શખ્સના મકાનમાં દારૂનો જથ્થો પડ્યો છે. તે બાતમીથી પીઆઈ વી.એમ. લગારીયાને વાકેફ કરાયા પછી પીએસઆઈ આર.કે. કરમટા, પી.એન. મોરીના વડપણ હેઠળ સ્ટાફે ત્યાં આવેલા રાહુલ ભીખુભાઈ સીંગરખીયા નામના શખ્સના મકાનમાં દરોડો પાડ્યો હતો.

તે મકાનની તલાશી લેતા ત્યાંથી ભારતીય બનાવટના અંગ્રેજી શરાબની ૧૭૦ બોટલ મળી આવી હતી. દરોડા પહેલાં રાહુલ સીંગરખીયા નાસી ગયો હતો. એલસીબીએ રૂ. ૬૮ હજારની બોટલ કબજે કરી સિટી સી ડિવિઝનમાં ગુન્હો રજીસ્ટર કરાવ્યો છે.

ધ્રોલ પોલીસ સ્ટેશનના સ્ટાફ દ્વારા ગઈકાલે કરાઈ રહેલા પેટ્રોલિંગમાં સ્ટાફના રાજેશ મકવાણા, કલ્પેશ કામળીયાને બાતમી મળી હતી કે, ભેંસદળ ગામમાં એક શખ્સ દારૂનું વેચાણ કરે છે. તે બાતમીના આધારે પીએસઆઈ પી.જી. પનારાના વડપણ હેઠળ ધ્રોલ પોલીસે ગઈકાલે સાંજે ભેંસદળ ગામમાં રહેતા આશિષ ખીમજીભાઈ વઘેરા નામના શખ્સના વાડામાં દરોડો પાડી તલાશી લીધી હતી.

તે વાડામાંથી અંગ્રેજી શરાબની બે જુદી જુદી બ્રાંડની બાવન બોટલ મળી આવી હતી. રૂ. ૨૬ હજારના દારૂ સાથે આશિષ વઘેરાની ધરપકડ કરાઈ છે. તેણે આ જથ્થો ઝાખર ગામના પાર્થ મકવાણા નામના શખ્સે આપ્યો હોવાની કબૂલાત કરી છે. પોલીસે તેનો મોબાઈલ પણ ઝબ્બે લીધો છે.

ધ્રોલ નજીક પીયાવા ચોકડી પાસેથી ગઈકાલે સાંજે જઈ રહેલા ભેંસદળ ગામના ડાયાભાઈ ખીમાભાઈ બાંભવા નામના શખ્સને પોલીસે દારૂની બોટલ સાથે પકડી લીધો છે.

જો આપને આ પોસ્ટ ગમી હોય તો શેર કરો...