કાલાવડ માર્કેટ યાર્ડમાં વૃદ્ધને હૃદયરોગનો હુમલોઃ વીજ કર્મચારીને આવ્યો હાર્ટ એટેક

Author: નોબત સમાચાર

કાલાવડ માર્કેટ યાર્ડમાં વૃદ્ધને હૃદયરોગનો હુમલોઃ વીજ કર્મચારીને આવ્યો હાર્ટ એટેક

ભાટીયામાં યુવાનને ભરખી ગયો હૃદયરોગઃ

જામનગર તા. ૧૬: કાલાવડના નાની વાવડી ગામના વૃદ્ધનું ગઈકાલે કાલાવડ માર્કેટીંગ યાર્ડમાં હૃદયરોગનો હુમલો આવી જતાં મૃત્યુ થયું છે. ઓખામાં રહેતા વીજ કર્મચારી તેમજ ભાટીયાના એક યુવાનને પણ હૃદયરોગનો હુમલો ભરખી ગયો છે.

દેવભૂમિ દ્વારકા જિલ્લાના ઓખામાં ગાંધીનગરી ૫ાસે રહેતા પેથાભાઈ પબાભાઈ શિરૂકા (ઉ.વ.પ૬) નામના વીજ કંપનીના કર્મચારી બુધવારે રાત્રે પોતાના ઘરે હતા ત્યારે છાતીમાં દુખાવો ઉપડતા સારવાર માટે મીઠાપુર સ્થિત ટાટા હોસ્પિટલમાં લઈ જવાયા હતા. જ્યાં ટૂંકી સારવાર પછી આ પ્રૌઢનું હૃદય રોગના હુમલાથી મૃત્યુ થયાનું હિતેશ પેથાભાઈએ પોલીસમાં જાહેર કર્યું છે.

કલ્યાણપુર તાલુકાના ભાટીયા ગામમાં રેલવે સ્ટેશન રોડ પર વસવાટ કરતા માલદે ભાઈ નાગાજણભાઈ ઓડેદરા નામના યુવાનને બુધવારે સાંજે છાતીમાં દુખાવો ઉપડતા ભાટીયાની ખાનગી હોસ્પિટલ અને ત્યાંથી વધુ સારવાર માટે કલ્યાણપુર સરકારી દવાખાને ખસેડાયા હતા. જ્યાં તેઓનું મૃત્યુ નિપજ્યું છે. ગોગનભાઈ ઓડેદરાએ પોલીસને વાકેફ કરી છે.

કાલાવડ તાલુકાના નાની વાવડી ગામમાં રહેતા ગોવિંદભાઈ ગોપાલભાઈ મુળછા (ઉ.વ.૭૨) નામના વૃદ્ધ ગઈકાલે સાંજે કાલાવડ ના નવા માર્કેટીંગ યાર્ડમાં આવેલી પોતાની દુકાને તાળું મારતા હતા ત્યારે કોઈ કારણથી બેભાન બનીને ઢળી પડ્યા હતા. સારવારમાં લઈ જવાયેલા આ વૃદ્ધનું હૃદયરોગ ના હુમલાથી મૃત્યુ નિપજ્યાનું પુત્ર નિતેશભાઈએ પોલીસને જણાવ્યું છે.

જો આપને આ પોસ્ટ ગમી હોય તો શેર કરો...