જામનગરના ત્રણ શખ્સે મોટર, ત્રણ ટ્રક, રૂ.૧૫ લાખ ઓળવી લીધાની રાવ

Author: નોબત સમાચાર

જામનગરના ત્રણ શખ્સે મોટર, ત્રણ ટ્રક, રૂ.૧૫ લાખ ઓળવી લીધાની રાવ

દોઢ વર્ષ પહેલાં મધલાળ બતાવી આચરાઈ છેતરપિંડીઃ

જામનગર તા. ૧૬: જામનગરના ત્રણ શખ્સ સામે પોરબંદરના ફટાણા ગામના એક ટ્રાન્સપોર્ટરે ઠગાઈ કર્યાની ફરિયાદ નોેધાવી છે. આ શખ્સોએ દર મહિને એક ટ્રકના રૂ.૧ લાખ ભાડા પેટે ઠરાવ્યા પછી ત્રણ ટ્રક, એક મોટર તેમજ હોડીના ધંધા માટે આપેલા રૂ.૧૫ લાખ ઓળવી લીધાની રાવ કરવામાં આવી છે.

૫ોરબંદર જિલ્લાના ફટાણા ગામમાં રહેતા અને ટ્રાન્સપોર્ટનો વ્યવસાય કરતા ગાંગાભાઈ ઠેબાભાઈ કોડીયાતર નામના આસામીએ સિટી સી ડિવિઝન પોલીસ સ્ટેશનમાં રઝાક દાઉદ ચાવડા ઉર્ફે સોપારી, અમીન નોતીયાર તથા રામ ભીમશીભાઈ નંદાણીયા સામે ફરિયાદ નોંધાવી છે.

ફરિયાદમાં જણાવવામાં આવ્યા મુજબ વર્ષ ૨૦૨૩ના જુલાઈ-ઓગસ્ટ મહિનામાં ઉપરોક્ત વ્યક્તિઓનો સંપર્ક થયો હતો. તેઓએ પોતાના મોટા કોન્ટ્રાક્ટ ચાલુ છે તેમાં તમારા ટ્રક મુકાવી દઈ દરેક ટ્રક પેટે દર મહિને રૂ.૧ લાખ ભાડુ અપાવવાની અને ટ્રકના મેઈન્ટેનન્સની પણ જવાબદારી લેવાની વાત કરી હતી.

આ શખ્સોની વાતોમાં આવી જઈ ગાંગાભાઈએ પોતાના ૧૨ ટ્રકમાંથી જીજે-૩૬-એેક્સ ૮૧૩૨, જીજે-૨૫-યુ ૫૯૩૩ અને જીજે-૩૬-એક્સ ૮૧૨૩ નંબરના ત્રણ ટ્રક તેમજ જીજે-રપ-એએ ૯૧૮૪ નંબરની સ્કોર્પિયો આપી હતી. તે ઉપરાંત ટગ (હોડી)ના ધંધા માટે રૂ.૧પ લાખ પણ તેઓએ લેવાના બાકી હતા. ઉપરોક્ત રકમ તથા ટ્રકની ભાડાની નક્કી કરેલી રકમ આ શખ્સોએ પરત નહીં આપતા આખરે ગાંગાભાઈએ પોતાની સાથે છેતરપિંડી, વિશ્વાસઘાત આચરનાર રઝાક સોપારી સહિત ત્રણ સામે ફરિયાદ નોંધાવી છે. પોલીસે ઠગાઈ આચરવા અંગે ગુન્હો નોંધી તપાસ શરૂ કરી છે.

જો આપને આ પોસ્ટ ગમી હોય તો શેર કરો...