જામનગરની સગીરાનું અપહરણ કરી દુષ્કર્મ ગુજારનાર શખ્સને વીસ વર્ષની કેદ

Author: નોબત સમાચાર

જામનગરની સગીરાનું અપહરણ કરી દુષ્કર્મ ગુજારનાર શખ્સને વીસ વર્ષની કેદ

ભોગ બનનારને ચૂકવાશે રૂ. ૪ લાખનું વળતરઃ

જામનગર તા. ૧૮: જામનગરની એક સગીરા સાથે ઈન્સ્ટાગ્રામમાં પરિચય થયા પછી એક શખ્સે પ્રેમજાળમાં ફસાવી લઈ લગ્નની લાલચ આપી તેણીનું અપહરણ કરી દુષ્કર્ર્મ ગુજાર્યાની બે વર્ષ પહેલા પોલીસમાં ફરિયાદ કરવામાં આવી હતી. તે કેસ ચાલી જતા અદાલતે આરોપીને ૨૦ વર્ષતી સખત કેદ ફટકારી છે અને ભોગ બનનાર સગીરાને રૂ. ચાર લાખનું વળતર અપાવ્યું છે.

જામનગરના એક વિસ્તારમાં વસવાટ કરતા મયુર પ્રફુલભાઈ ફટાણીયા નામના શખ્સે વર્ષ ૨૦૨૩માં ઈન્સ્ટાગ્રામમાં જામનગરની જ એક સગીરા સાથે પરિચય થયા પછી અવારનવાર મેસેજ તથા મોબાઈલ પર વાત કરી પ્રેમસંબંધમાં ફસાવી હતી. આ સગીરાને લગ્નની લાલચ આપી મયુર ફટાણીયા પોતાની સાથે નસાડી ગયો હતો. આ શખ્સે તેણી પર દુષ્કર્ર્મ ગુજાર્યાની ગઈ તા. ૨૧-૧૦-૨૩ના દિને પંચકોશી બી ડિવિઝન પોલીસ સ્ટેશનમાં ફરિયાદ કરવામાં આવી હતી. પોલીસે પોકસો એકટ તથા આઈપીસીની કલમ હેઠળ ગુન્હો નોંધી આરોપીની ધરપકડ કરી હતી.

ઉપરોકત કેસ જામનગરની ખાસ પોકસો અદાલતમાં ચાલી જતા અદાલતે સરકાર પક્ષ તરફથી રજૂ થયેલા ૩૮ દસ્તાવેજી પૂરાવા અને દલીલોને ગ્રાહ્ય રાખી આરોપી મયુર પ્રફુલભાઈ ફટાણીયાને તકસીરવાન ઠરાવી વીસ વર્ષની સખત કેદની સજા અને દંડ ફટકાર્યો છે. ભોગ બનનાર સગીરાને રૂ. ચાર લાખ વળતર પેટે ચૂકવવામાં આવશે. સરકાર તરફથી ડીજીપી જમન ભંડેરી રોકાયા હતા.

જો આપને આ પોસ્ટ ગમી હોય તો શેર કરો...