જામનગરનો ફલાયઓવર બ્રિજ બન્યો હરવા-ફરવાનું ડેસ્ટિનેશન અને 'ધૂમ સ્ટાઈલ'નો રેસિંગ ટ્રેક

Author: નોબત સમાચાર

જામનગરનો ફલાયઓવર બ્રિજ બન્યો હરવા-ફરવાનું ડેસ્ટિનેશન અને 'ધૂમ સ્ટાઈલ'નો રેસિંગ ટ્રેક

ઈંદિરા માર્ગના સર્કલોનો ટ્રાફિક કેટલો ઘટ્યો, તે રામ જાણે, પરંતુ ચડવા-ઉતરવાના છેડે અણઘડ બાંધકામથી સર્જાઈ રહ્યાં છે અકસ્માતો...

જામનગર તા. ર૮: સમગ્ર સૌરાષ્ટ્રના સૌથી લાંબા ફલાય ઓવરનું લોકાર્પણ થવાની સૌ કોઈ આતુરતાપૂર્વક રાહ જોઈ રહ્યાં હતાં... રૂપિયા સવા બસ્સો કરોડના ખર્ચે તૈયાર થયેલા આ ફલાય ઓવરના લોકાર્પણ થયા પછી શહેરની મધ્યમાંથી પસાર થતા ઈંદિરા માર્ગ પરના ટ્રાફિકના ભારણમાં કેટલો ઘટાડો થયો તેનો અંદાજ હજી આવી શક્યો નથી...! કારણ કે ટ્રાફિક સમસ્યા ઘટવાની કોઈ વાસ્તવિક કે નોંધપાત્ર અસર જણાતી નથી.

ઉલ્ટાનું આ ફલાય ઓવર બ્રિજના ચડવાના-ઉતરવાની જગ્યાએ અણઘડ કામ થયું હોવાથી રોંગ સાઈડમાં યુ-ટર્ન લેવો પડે, ટૂંકો ટર્ન લેવો પડે, ફલાય ઓવર પર ચડવા-ઉતરવા માંગતા વાહનો ઓચિંતા સામે આવી જાય તેવી સ્થિતિ જોવા મળી રહી છે. એટલું જ નહીં, લોકાર્પણના બે-ત્રણ દિવસમાં જ આ ખૂણાઓ ઉપર વાહનો અથડાવવાના ઘણાં બનાવો પણ બની ગયા... તો ફલાય ઓવર પર પૂરપાટ વેગે દોડતા ફોરવ્હીલર ક્યાંક ડીવાઈડર પર ચડી ગયા...!

રોશની અને લાઈટીંગથી ઝળહળતા ફલાય ઓવર ઉપર ડ્રાઈવીંગ કરવાની મોજ માણવા નગરના શોખીનો ફલાય ઓવર પર ઉમટી પડ્યા. અનેક લોકોએ તો જાણે હરવા-ફરવાનું નિરાંતનું સ્થળ હોય તેમ ફલાય ઓવર ઉપર પોતાના વાહનો પાર્ક કરી બેસી ગયા...! વાહનો પણ ફલાય ઓવર પરના ટ્રાફિકના ફલોને અવરોધરૂપ બને તેવી રીતે રાખીને ઊભા રહ્યાં હતાં.

અર્થાત... આ ફલાય ઓવર ટ્રાફિકને સુવ્યવસ્થિત રીતે નિયમન કરવા, ટ્રાફિક સમસ્યા ઘટાડવા, અકસ્માતો નિવારવાના હેતુનો રીતસર છેદ ઉડી રહ્યો હોય તેમ જણાય છે.

આ ફલાય ઓવર હરવા-ફરવાના સ્થળની વાત જવા દઈએ તો પણ ધૂમ સ્ટાઈલથી ટુ-વ્હીલર/બાઈક ચલાવનારાઓને તો જાણે આ ત્રણ કિ.મી.ના ફલાય ઓવરના માર્ગ ઉપર બેફામપણે, સ્ટન્ટ કરતા કરતા, રીલ્સ બનાવતા બેફિકરા લોકો-લુખ્ખા લોકોને પીળો પરવાનો અને ગામની વચ્ચે જ રેસીંગ ટ્રેક મળી ગયો હોય તેવા દૃશ્યો પણ જોવા મળી રહ્યાં છે.

તેમાંય વળી પાન-મસાલા-ગુટકાના શોખીનો તો આ ફલાય ઓવરના રંગરોગાન કરેલ ચોખ્ખી જગ્યાએ, પેરાપેટની દીવાલો, ડીવાઈડર ઉપર ઘેરા લાલ રંગની પીચકારીઓ મારવી, થૂંકવું, પ્લાસ્ટિકનો કચરો ફલાય ઓવર ઉપર ફેંકવાની મજા આવી ગઈ છે, જેથી બે-ત્રણ દિવસમાં જ ફલાય ઓવર ઉપર જ્યાં-ત્યાં પાનની પીચકારીઓના ડાઘા, કચરો, પ્લાસ્ટિક વગેરે જોવા મળતા થઈ ગયા છે... જો આવુને આવુ ચાલ્યુ તો ફલાય ઓવર પાનની પીચકારીઓના ગેરૂ/લાલ રંગથી રંગાઈ જશે...!

ફલાય ઓવરનો અનુભવ કરવા અને નિરીક્ષણ કરવા ગયેલા લોકોમાંથી અનેક લોકોએ વિકટોરીયા પૂલ પાસેના ઢાળ ઉપર છેલ્લા ર૦૦-૩૦૦ મીટર સુધીના માર્ગ ઉપર ડીવાઈડર શા માટે રાખ્યું નથી તેવો પ્રશ્ન ઉઠાવ્યો છે. તેમજ અહીં શું ટર્ન લેવા માટે સુચારૂ વ્યવસ્થા ગોઠવવાની જરૂર હોવાનું જણાવ્યું હતું.

આમ અત્યારે તો આ ફલાય ઓવર એક અતિ ઉપયોગી ભેટ ભલે બન્યો... પણ સાથે-સાથે ચર્ચા અને ટીકાનું કેન્દ્ર પણ બની રહ્યો છે.

નાગનાથ ચોકડીથી સ્મશાન તરફ જવા-આવવા માટે ભારે મુશ્કેલી થાય તેવી સ્થિતિ છે. ફાલય ઓવરમાં આ ક્રોસીંગ ઉપર સાવ નાનકડો ગાળો જ રાખ્યો છે અને તેમાં પીલરના બદલે દીવાલ ચણી દેવાઈ હોવાથી વાહનોની અવરજવર એકબીજાને દેખાતી જ નથી...! અહીં પણ નાના-મોટા અકસ્માત થવાની પૂરી શક્યતા છે...!

આ ફલાય ઓવર ઉપર થોડા-થોડા અંતરે સતત કાર્યરત રહે તેવા સીસી ટીવી કેમેરા, સ્પીડ મીટર મૂકવાની જરૂર છે અને તેના માધ્યમથી વધુ ઝડપથી દોડતા, રોંગ સાઈડ આવતા વાહન ચાલકો ઉપર કેસ-દંડ થઈ શકે..!

ક્યા બાત હૈ...!

એક ખૂબ જ અભ્યાસુ વ્યક્તિએ આખા ફલાય ઓવરનું ડ્રોન દ્વારા શૂટીંગ કર્યુ... તે વિડીયોમાંથી કોમ્પ્યુટર ટેકનીકથી ફલાય ઓવરને ગાયબ કરીને પછી આ ત્રણ કિ.મી. માર્ગના ફોટા સ્ટીલ કર્યા... પછી ફલાય ઓવર સાથેના અને ફલાય ઓવર વગરના ફોટાઓની સરખામણી કરી એવું તારણ દર્શાવ્યું કે, જો ફલાય ઓવર વગર દબાણો હટાવ્યા પછી આટલો પહોળો અને બન્ને તરફના સર્વિસ રોડ સહિતનો (કમ સે કમ ૧૦૦-૧પ૦ મીટર) માર્ગ બની જ શક્યો હોત... અને આટલો પહોળો માર્ગ શક્ય હોય તો ટ્રાફિક સમસ્યાનો પ્રશ્ન પણ ઊભો થાય જ નહીં...!

જો આપને આ પોસ્ટ ગમી હોય તો શેર કરો...